Duke nisur nga e enjtja deri të dielën e 16 gushtit 2020, mijëra qytetarë shqiptarë që jetojnë dhe punojnë në Greqi qëndruan në radhë të gjata në pikën kufitare të Kakavijës. Radhët kilometrike u cilësuan biblike, duke e krahasuar me pamjet e  largimeve të shqiptarëve 30 vjet më herët me anije drejt Italisë.

Shkak për radhët e gjata u bë regjimi i ri i masave nga ana e shtetit grek për parandalimin e virusit COVID-19. Prej ditës së sotme, sipas vendimit të shteti grek, do të kalojnë kufirin personat të cilët kanë kryer testin e COVID-19 dy ditët e fundit dhe rezultojnë negativë.  Pas kalimit të kufirit qytetarët duhet të qëndrojnë 7 ditë në karantinë në vendin ku shkojnë.

Shtrëngimi i masave bëri që me mijëra qytetarë të dynden në kufijtë me Greqinë, duke e çuar numrin e personave në radhë në Kakavijë në 15 mijë qytetarë që qëndruan për më shumë se 3 ditë në diellin dhe vapën zhuritëse të gushtit.

Të shtunën, situata u tensionua edhe më shumë, ndërsa një 10-vjeçar humbi jetën nga një aksident si pasojë e përplasjes me një ambulancë. Për këtë ngjarje është hapur një hetim për të kuptuar më qartë shkaqet.

Qëndrimi në radhët kilometrike në kufi mori fund natën e të dielës, pas shtimit të orareve të shërbimin nga ana greke edhe gjatë natës.

Insitucionet shtetërore “ping-pong” përgjegjësish 

Pas shtimit të radhëve në kufirin me Greqinë në Kakavijë, qytetarët u shprehën se kishin telefonuar Ministrin e Jashtëm në detyrë të Shqipërisë, Gent Cakaj, por telefoni i tij ishte i mbyllur, ndërsa më vonë u bë me dije se ndodhej jashtë vendit.

Të premten, me anë të një reagimi në Twitter, Cakaj deklaroi se kishte pasur një telefonatë me homologun e tij grek për të lehtësuar kalimin në Kakavijë.

Më i vonshëm ishte reagimi i Kryeministrit Rama, i cili përmes një statusi të gjatë në rrjetin social Facebook rikonfirmoi komunikimin me Kryeministrin e Greqisë Mitzotakis, ndërsa kundërshtoi komentet për padrejtësi dhe diskriminim ndaj shqiptarëve.

“….nuk bëhet fjalë për asnjë lloj padrejtësie apo diskriminimi ndaj shqiptarëve, siç thonë “patriotët” që luftojnë për dinjitetin e atdheut nga ajfoni i tyre. Këtu është fjala për një regjim të ri kontrollesh kufitare, me tamponimin e detyrueshëm të kujtdo që kalon kufirin e Greqisë, qoftë shqiptar, qoftë suedez apo britanik, shtetas këta që si gjithë të tjerët i nënshtrohen testimit në çdo aeroport të vendit fqinj. Madje edhe vetë shtetasit grek kanë të njëjtin detyrim dhe të njëjtin trajtim”,-u shpreh Rama.

Situata u ndoq edhe nga Presidenti Ilir Meta, i cili i bëri thirrje qeverisë shqiptare për të qëndruar pranë qytetarëve duke i informuar dhe duke kryer falas tamponët në vendin ku ndodhen. Meta i kërkoi edhe autoriteteve greke të bëjnë të pamundurën për zgjidhjen e situatës, për të shmangur edhe imazhet, të cilat sipas tij turpërojnë të dyja vendet.

Ndërsa situata vijonte të mbetej e njejtë dhe rradhët nuk ishin shkurtuar, Kryeministri Rama shprehu indinjatën me komentet e adresuara ndaj tij për mënyrën se si po menaxhohej situata. Ai e paralelizoi situatën me vënde të tjera të cilat po kalonin njësoj në këto kohë pandemie.

“Në kufirin greko-bullgar të Kulatas, radha dje ishte plot 5 kilometra dhe askush në Bullgari nuk kërkon hapjen e ndonjë lufte bullgaro-greke, ashtu sikundër i njëjti problem shfaqet edhe në pika të tjera kufitare, ndërkohë që për shembull, në pikën kufitare të Kapikulesë në Turqi, numri i makinave në radhë ishte shtrirë dhjetra kilometra. Po edhe andej nuk janë dëgjuar as thirrje për luftë, as thirrje për djegie njerëzish të gjallë. As kolapsi në Portin e Doverit ku janë turrur britanikët për t’u kthyer në shtëpi nga Franca, pas rregullit të beftë të karantinës së detyruar, nuk ka ngjallur ndonjë fantazëm lufte apo dëshirë për gijotinimin e “monstrave” në Paris a Londër”,- citon Kryeministri Rama.

Vetëm ditën e shtunë Partia Demokratike e Shqipërisë reagoi në lidhje me situatën kaotike të shkaktuar në Kakavijë, teksa ia adresoi fajin qeverisë shqiptare që lejoi krijimin e radhëve të gjata.

“Kjo ngjarje e rëndë është një tjetër alarm tragjik për braktisjen e qytetarëve nga qeveria. Është e pafalshme që qeveria lejoi krijimin e radhëve të gjata, dhe nuk informoi qytetarët në kohë. Është në përgjegjësinë e qeverisë që Shqipëria u shndërrua në zonë të kuqe COVID, pasojë e të cilës është edhe kjo krizë humanitare në kufi”,-thuhej në reagimin e PD-së.

Në mbrëmjen e së dielës, pas zgjidhjes së situatës Rama falenderoi qytetarët për durimin, emergjencat civile, ushtrinë, policinë dhe urgjencën shëndetësore për asistencën në terren.

Ditën e sotme, në daljen për shtyp para mediave, Presidenti Meta ngarkoi me përgjegjesi për situatën në Kakavijë qeverinë shqiptare. Ai u kërkoi ndjesë qytetarëve që kaluan përmes këtyre sakrificave.

Për kryeministrin Rama, reagimi i Presidentit është thjesht një avaz i vjetër.

Shkrirja e ambasadës shqiptare në Athinë, pasojë indirekte e situatës në Kakavijë?

Situata që shoqëroi për 4 ditë rradhazi qytetarët shqiptarë banues në Greqi në Kakavijë, shtoi debatet publike në lidhje me arsyet e lëvizjes së tyre në kohë pandemie. Nga intervistat e kryera nga gazetarët në terren, një pjesë e tyre u shprehën se arsyeja e ardhjes në Shqipëri ishte skadimi i pasaportave dhe nevoja për rinovimin e tyre.

Më herët, më 8 korrik të vitit 2020, ministri në detyrë për Europën dhe Punët e Jashtme Gent Cakaj, shkarkoi të gjithë stafin dhe ambasadoren shqiptare në Athinë. Shkak ishte performanca e ulët e këtij institucioni. Ndërsa një vit më herët, konsulli në Janinë Pervin Gjikuria u shkarkua dhe ambasadorja, Ardiana Hobdari mori masë disiplinore për zhdukjen e 100 pasaportave.

Në fund të korrikut me dhjetra shqiptarë u mblodhën pranë ambasadës shqiptare ën Greqi për të marrë pasaportar, por nuk e kanë marrë ëktë shërbim për shkak të ndryshimit të personelit.

Gazetari Blendi Salaj, në një reagim në profilin e tij publik në “Facebook” thekson se mos funksionimi i Ambasadës shqiptare në Greqi mund të mos ketë qenë shkaktarja e krizës humanitare në Kakavijë, por ka qenë një nga elementët që ka detyruar qytetarë të kthehen në vend për nevojë dokumentacioni.

Raporto

PËRGJIGJU

Ju lutemi shkruani komentin tuaj!
Ju lutem shkruani emrin tuaj këtu