Prej mesditës së të mërkurës, minatori 60 vjeçar Muharrem Plaku ndodhet i bllokuar në një nga minierat në Bulqizë. Shkak është bërë shembja e një masivi shkëmbor gjatë kohës që ai punonte në galerinë e kompanisë “Kaduretex Sh.p.k”.
Sipas minatorëve të tjerë, Muharrem Plaku punonte në zonën 1 të minierës si zjarrmtar.
“Punonte në zonë të parë si minator zjarrmtar. Është minatori që bën vrimat në shkëmb, kurse zjarrmtari e mbush me lëndë plasëse”,-u shpreh Beqir Duriçi, minator në Bulqizë.
Edhe pse kanë kaluar 48 orë nga bllokimi brenda në minierë, ende vijojnë kërkimet për gjetjen e tij.
Për nxjerrjen e minatorit Plaku janë angazhuar një grup i avari-shpëtimit, kolegë të Muharremit dhe minatorë nga galeri të tjera, mirëpo situata mbetet e vështirë për shkak të pozicionit.
“Ata thjesht kanë ardh’ me shly veten e vet gjoja që erdhëm po këtu s’mbaj mend të nxjerrin minatorë, punëtorë. Këtu e kanë nxjerrë shokët e vet ose grupi i punës. Unë për vete që kam punuar 30 vjet aty, para se me u shkarku nga puna, unë i kam pa me sytë e mi se i kam pas nxjerrë vetë”,-shprehet skeptik Beqir Duriçi për angazhimin e grupit të avari-shpëtimit.
Autoriteti Kombëtar për Sigurinë dhe Emergjencat në Miniera (AKSEM) refuzoi të jepte detaje nga procesi i kërkim-shpëtimit, duke na orientuar për të marrë informacion në zyrën e shtypit të ministrisë.
“Atje vazhdon puna, ju lutem se unë e kuptoj dhe punën tuaj. Atje vazhdon puna për nxjerrjen e viktimës. Më gjatë informacionin do ta merrni në zyrën e ministrisë”,-u përgjigj Rrapush Tola, kreu i AKSEM.
Rrapush Tola, drejtues i Autoritetit Kombëtar për Sigurinë dhe Emergjencat në Miniera
Ndërsa në faqen zyrtare të Ministrisë së Energjisë dhe Infrastrukturës nuk ka asnjë reagim apo informacion në lidhje me ngjarjen në Bulqizë.
Sindikata e Minatorëve të Bashkuar përmes një postimi në faqen zyrtare në Facebook ka kërkuar që shteti të kthejë sytë nga Bulqiza në këtë situatë.
“Shteti dhe mobilizimi i institucioneve shtetërore ka qenë qesharak, edhe pse kanë kaluar më shumë se dy ditë. E gjithë vëmendja është përqëndruar te parlamenti i ri i padrejtësive të vjetra. Asnjë fjalë nuk kanë thënë për minatorin Muharrem Plaku”,-u shpreh SMBB
Kjo ngjarje vjen pas plagosjes së dy minatorëve të tjerë gjatë punës në minierë, të hënën e kësaj jave. Puna në minerë vijon të mbetet e rrezikshme si pasojë e mungesës së sigurisë dhe kushteve në galeri. Vetëm gjatë vitit 2021 janë plagosur 8 minatorë, ndërsa viti i shkuar për minatorët i ngjan një bilanci lufte, me 5 të vdekur dhe 28 të plagosur.
