Shembet vila në rrugën e Barrikadave, nisin punimet për ndërtimin e një tjetër pallati

Me datë shtatë janar u shemb një tjetër vilë historike në Tiranë. Banesa tip vilë dy katëshe u shpall në vitin 2015 “Monument Kulture Kategoria e Dytë”, me kodin II-229 për ta humbur statusin vetëm tre vite më pas.

Në vend të vilës do të ngrihet një pallat 17 katesh, tre prej të cilave do të jenë nëntokë.

Projekti i ndërtimit të pallatit

Shembja e vilës erdhi pas heqjes së statusit nga i njëjti institucion që i kishte dhënë mbrojtjen para tre vitesh. Specialistët e Drejtorisë Rajonale të Kulturës Kombëtare (DRKK) dhe specialistë të Instituti të Monumenteve të Kulturës (IKTK), kryen një inspektim në vitin 2017, për të verifikuar gjendjen e objekteve monument kulture.

Një vit më pas, me datë 08.01.2018 u propozua heqja e disa godinave historike nga lista e monumenteve, përfshirë dhe vilën te rruga e Barrikadave.

Në po të njëjtin muaj, në 25.01.2018, asokohe Ministrja e Kulturës, Mirela Kumbaro, në një dokument të vetëm firmosi heqjen e statusit të pesë godinave Monument Kulture Kategoria II.

IKTK, DRKK dhe Ministria e Kulturës janë tre institucionet përgjegjëse për ruajtjen dhe mirëmbajtjen e trashëgimisë kulturore në Shiqpëri.

Shembja e kësaj vilë e çon në 18 numrin e godinave Monument Kulture të shembura pesë vitet e fundit.

Sipas investigimit të kryer nga Citizens Channel, për 45 godina/vila Monument Kulture të marra në studim në Tiranë kemi 36 urdhra për heqje të statusit, veprim që ka çuar në shembjen e 18 vilave/godinave historike, ku 17 prej tyre janë zëvendësuar me pallate.

Lexo më shumë:

“36 monumente më pak”, Si vilat e vjetra të Tiranës po zëvendësohen me pallate

Foto ilustrim: Elsa Paja

Njëkohësisht, zonat historike të Tiranës janë kthyer në kantiere ndërtimi. Prej vitit 2015, numri i lejeve të ndërtimit në kryeqytet është 1768. Viti 2016 shënon fillimin e rritjes së vrullshme të ndërtimit, që kulmon me 388 leje në vitin 2018, ndërsa për çdo vit numri i lejeve nuk ka rënë nën 250, shifër 6 herë më e lartë se ajo e vitit 2012.

Raporto

PËRGJIGJU

Ju lutemi shkruani komentin tuaj!
Ju lutem shkruani emrin tuaj këtu