Çdo ditë të vitit mes vapës e shiut, librashitësit e rrugës bëjnë “panairin e tyre” të vogël të librit. Tek ata mund të gjesh libra të përdorur dhe të rinj me çmime të ulëta duke nisur nga 100 lekë.
Malko Zaçe e ushtron këtë profesion prej 20 vitesh dhe nuk ka menduar asnjëherë që ta ndryshojë pavarësisht vështirësive që ka.
Kioska ku mban librat e tij Malko Zaçe/ Foto: Arbjona Çibuku
“Asnjëherë s’e kam menduar, sepse unë librin e kam pasion, unë mund të shisja dhe patate po nuk e bëj se nuk shkëputëm dot nga libri”, rrëfen Zaçe, teksa tregon librat që mban në një hyrje të vogël në rrugën “Jordan Misja”.
Malko Zaçe duke shitur libra në rrugë “Jordan Misja” Tiranë/ Foto: Arbjona Çibuku
“Në fillim kam shitur tek Pazari i Ri, po na spostuan këtu, edhe pak edhe kush e di ku do na çojnë”, thotë ai teksa shton se paguan qira për godinën e vogël ku mban librat.
Fillimisht e ka nisur profesionin me librat që ka pasur në bibliotekën personale. “Pastaj fillova të mbledh tek familjet e tjera, ose mi sjellin ata vetë, kur nuk i duan më dhe unë i shes këtu me çmim shumë të lirë”, tregon Zaçe. Ai ka shkruar dhe një libër të cilin na e tregon.
Malko Zaçe duke mbajtur në dorë librin e tij/ Foto: Arbjona Çibuku
Gjatë këtyre viteve ai ka shfletuar shumë libra duke pritur në rrugë që të shesë ndonjë, pjesën më të madhe të librave që shet ai thotë se i ka lexuar.
“Por kam lexuar dhe libra të njerëzve të thjeshtë sepse ata kanë në vetvete gjëra që ne nuk i gjejmë as tek autorët e mëdhenj. Ja para pak kohësh lexova një mësues nga Përmeti”, tregon Zaçe.
Librashitësi duke sistemuar librat e tij/ Foto: Arbjona Çibuku
Teksa e pyesim nëse do kishte dashur të kishte një stendë në panairin e librit ai shprehet se “është shumë shtrenjtë, nuk e përballoj dot”, por shton se aty libri është kthyer në biznes dhe kjo gjë e mërzit.
Libra në rrugën “Jordan Misja”/ Foto: Arbjona Çibuku
Pak metra më tej qëndron një tjetër librashitës, i cili po ashtu ushtron këtë profesion prej 20 vitesh.
Një librashitës në rrugën “Jordan Misja”/ Foto: Arbjona Çibuku
“Unë nuk bëj asnjë punë tjetër veç kësaj, i vetmi problem që kam pasur është që më ka ardhur bashkia e më ka shtyrë sa në një rrugë në tjetrën”, tregon ai.
“Kam një faqe në internet i shes aty dhe ka shumë interes”, rrëfen librashitësi.
Librashitësi duke shfletuar një libër/Foto: Arbjona Çibuku
Tek kryqëzimi i rrugës Sami Frashëri gjetëm një librashitëse, Koleta Hajdari, e cila e ka nisur para dy vitesh këtë profesion.
Shitësja e librave Koleta Hajdari/ Foto: Arbjona Çibuku
“Jam shumë e lumtur me punën time të re, më përpara punoja në fabrikë këpucësh, një punë shumë e rëndë”, tregon Hajdari.
Koleta Hajdari duke sistemuar librat/ Foto: Arbjona Çibuku
Ajo shprehet se puna e re i ka shtuar dhe dëshirën për librin. “Më përpara nuk lexoja shumë se nuk kisha as kohë, por tani jam më e lirë dhe këtu kur pres lexoj, kam krijuar dhe një bibliotekë në shtëpi sëbashku me bashkëshortin tim”, i tha Citizens Channel Koleta.
Libra tek kryqëzimi i rrugës “Sami Frashëri”/ Foto: Arbjona Çibuku
Përpos pasionit që ajo ka për punën e saj shprehet se ka shumë vështirësi, sidomos në ditët me shi.
“Kur bie shi nuk shesim dot, kemi këto plasmaset që i përdorim, por na lodhin”, shprehet ajo.
Një klient duke shlfetuar një libër/Foto: Arbjona Çibuku
Në zonën e njohur si “Ura e Bllokut” takohemi me një tjetër çift librashitësish.
Libra në shitje tek Ura e Bllokut/ Foto: Arbjona Çibuku
“Kam shumë vite që e bëj këtë profesion”, thotë ai dhe na tregon librat që shet, të cilët i mbledh nga librari private. “Çmimet i kemi më të lira se në panair”, përmbyll ai.
Librashitësi duke i kthyer lekët një klienteje/ Foto: Arbjona Çibuku
Ka mbaruar studimet e nivelit Bachelor në “Gazetari Politike” në Universitetin e Tiranës dhe aktualisht ndjek studimet e nivelit master për “Gazetari Investigative” në Fakultetin e Historisë dhe Filologjisë. Prej tre vitesh ka punuar si gazetare në median e shkruar dhe atë online, si dhe ka qenë e angazhuar si aktiviste kryesisht në kauzat studentore. Aktualisht është gazetare pranë Citizens Channel
