Që prej nisjes së vitit 2023 e deri më sot, punonjësit e Portit të Shëngjinit nuk kanë marrë asnjë rrogë. Për këtë arsye ata protestuan sot në ambientet e Portit duke refuzuar të nisnin punë pa marrë një reagim nga Drejtoria e Portit.
“Kemi ardh në këtë ditë që ne nuk marrim dot rrogat, nuk marrim lekët e bukës, kemi kredi, kemi marrë over-drafte, kemi ujë e drita, me mbajt shpinë, të gjitha në kurriz tonë ”,- tha për Citizens Channel Pjetër Gjinkola, Inspektor i Repartit Zjarrfikës.
Kjo është protesta e dytë e punonjësve të Portit të Shëngjinit. Në12 janar ata protestuan për rrogat e muajit dhjetor. Gjinkola konfirmon se punonjësit që kanë tre muaj pa marrë pagat janë Sektori Zjarrfikës, punëtorët e ngarkim – shkarkimit, transportit dhe ofiçinës.
“Sektorit të sigurisë i ka kaluar dje vetëm një muaj pagesë. Nuk mund të kalohen rrogat vetëm një sektori, është në shkelje të ligjit sepse nuk ka drejtë drejtori të bëj diferencime”,- vijon ai.
Gjinkola thekson se kjo situatë vjen si pasojë e keq menaxhimit të udhëheqësve. Ai tregon se në vitet e fundit drejtorët në Port janë ndërruar shpesh herë dhe askush prej tyre nuk ka denoncuar mosfunksionimin dhe problematikat e institucionit.
“Kontrolli i Lartë i Shtetit për çdo pranverë bën kontroll në Port për mbarëvajtjen financiare të portit. P.sh., në Portin e Shëngjinit prej katër vitesh vjen emri i shefes financës si shkaktare kryesore e prishjes së performancës financiare të Portit. I vjen shkresa për largim nga puna dhe marrje mase nga Këshilli Mbikëqyrës dhe Drejtoria dhe ajo është shefja prapë”,- analizon ai.
Pjetër Gjinkola shpjegon se përveç pagave sektori i zjarrfikëses nuk disponon kushtet minimale të ushtrimit të profesionit, ndër to as uniformat.
“Nuk mund të ketë aeroport dhe port pa sektor zjarrfikës! Kush do e garantoj sigurinë? Kalata re është jashtë funksionit, pompa jashtë funksionit, ata duan të bëjnë vetëm investime fiktive dhe e kanë falimentuar portin”,- përfundoj ai.
Mark Përkola, Specialist i Repartit Zjarrfikës në Portin e Shëngjinit tregon se drejtori i portit deklaroj në prezencë të mediave se atij dhe Pjetër Gjinkolajt nuk do ti kalohej paga.
“Normal se ne i sollëm mediat, ne s’na i japin, formë presioni është kjo”,- konfirmon Përkola për Citizens Channel.
Ai shprehet se deri në zgjedhjet e ardhshme lokale ku do të bëhet dhe reforma rrezikon të vazhdoj e njëjta situatë.
“Ne do bllokojmë funksionim e portit nëse nuk do të ketë rroga”,- pohon ai.
Një vit më parë, kryeministri Edi Rama premtoi realizimin e 4 porteve duke përfshirë edhe portin turistik të Shëngjinit. Drejtoria e Portit ka pranuar më herët vështirësitë financiare të krijuara nga mungesa e të ardhurave në këtë institucion që është me vetëfinancim, por qe sipas tyre po punohet për ti dhënë zgjidhje problematikës.
