“Bashkëqeverisja del kundër HEC-it në Mirditë” – Kompania nuk ka ndjekur procedurat

Kërkesa e banorëve të Mirditës drejtuar Platformës së Bashkëqeverisjes ka marrë përgjigje zyrtare. Mësohet  se kompania “EME Energy” sh.p.k nuk ka aplikuar pranë Agjencisë Kombëtare të Mjedisit për procedurat e vlerësimit të ndikimin në mjedis. Lidhur me këtë praktike të munguar, bazuar në ligjin 146/2014 “Për Njoftim dhe Konsultim Publik“, kompania ka shmangur procedurën e konsultimit publik duke mos përfshirë banorët në vendimmarrje.

Përgjigja nga Platforma e Bashkëqeverisjes ndaj kërkesës për informacion të banorit Lekë Gjoka

Ndërtimet në këtë zonë të Mirditës janë miratuar nga Këshilli Kombëtar i Territorit (KKT) me datë 06.11.2018. Punimet janë parashikuar të kryhen në përroin e Shën Gjergjit të Gurrëzës, degë e lumit të Fanit të vogël, me subjekt zhvillues shoqërinë “EME Energy” sh.p.k.

Referuar Fletores Zyrtare të Republikës së Shqipërisë, udhëzimi numër tre i datës 2.12.2013 “Për dokumentacionin e domosdoshëm për të kërkuar leje mjedisore të tipit A, B dhe C për aktivitetet të reja dhe ekzistuese” pika d informon që dokumentacioni i plotë dhe i nevojshëm duhet të përmbajë, ndër të tjera, të dhëna të konsultimit me publikun. Banorët shprehen se nuk janë kryer këto konsultime dhe nuk u është marrë mendimi rreth ndërtimit të hidrocentralit në zonën ku ata banojnë. 

Udhëzimi i mësipërm gjithashtu përfshin dokumentim të pjesëmarrjes nga pushteti vendor, përfaqësues të Agjencisë Rajonale dhe palët e interesuara sipas ligjit në fuqi. Po ky ligj kërkon nga subjektet që të bashkëngjisin materiale që vërtetojnë zhvillimin sipas procedurës përkatëse. Këto  materiale janë:

  • Proces-verbale të takimeve
  • Listën e personave të pranishëm
  • Materialet e prezantuara
  • Foto

Shqipëria ka ratifikuar Konventën mbi Aksesin në Informacion, Pjesëmarrjen e Publikun në Vendimmarrje dhe Akses në Drejtësi për Çështje Mjedisore (Aarhus) pjesë e Komisionit Ekonomik të Kombeve të Bashkuara për Evropën (UNECE) që prej vitit 2001. Kjo konventë i garanton çdo qytetari të drejtën e informimit, pjesëmarrje në proceset vendimmarrëse  dhe të drejtën për të kundërshtuar vendimet e ndërmarra nëse nuk janë respektuar dy pikat e mësipërme. 

Banorët e zonës së Fanit prej javësh kanë protestuar dhe kanë arritur t’i pengojnë fillimet e punimeve në lumenjtë e zonës. Ata janë shprehur edhe më herët se nuk është kryer procedura sipas kuadrit ligjor, të cilën e vërteton tashmë edhe përgjigja e sjellë nga Platforma e Bashkëqeverisjes.  Citizens Channel ka raportuar mbi protestat e ndodhura në Mirditë dhe nga intervistat e dhenë banorët shprehen se ndërtimi i hidrocentraleve do u ndikojë negativisht në ujin e pijshëm, në vaditje, kullota dhe ekosistem.

*Citizens Channel/Entenela Ndrevataj

Protesta e fermerëve zhvendoset para ministrisë: “Kërkojmë djersën tonë, asgjë më tepër”

Protesta e fermerëve të rrethit të Mallakastrës, Fierit dhe Lushnjës u zhvendos sot para Ministrisë së Bujqësisë dhe Zhvillimit Rural. Në vazhdimësi të protestave të njëpasnjëshme, fermerët kanë vendosur ta përshkallëzojnë atë në mënyrë që pesë kërkesat e tyre të plotësohen.

Ministria e Bujqësisë, nëpërmjet sekretarit të përgjithshëm Enea Hoti, kërkoi që të zhvillojë një takim me kryesinë e fermerëve. Ata njoftuan se nuk janë në dijeni të kërkesave të parashtruar, ndonëse fermerët prej javësh i kanë artikuluar problemet e tyre duke bllokuar, në shenjë simbolike, akset kryesore të Fierit dhe kanë derdhur shumë prodhime në rrugë.  

Protestuesit pohojnë se kërkesat e tyre në fakt janë bërë publike në formë të vazhdueshme duke i shpalosur në 4 protestat e organizuara gjatë këtyre dy muajve të fundit.  

Ata deklaruan se nuk i dinë kërkesat tona pavarësisht se ne i kemi afishuar në media, i kemi shkruar nëpër pankarta, po ndoshta nuk i kanë lexuar. Si duket janë marrë me numrimin, duke numëruar sa protestues jemi“, shprehet një nga fermerët gjatë protestës para ministrisë.  

Fokusi kryesor është subvencionimi nga qeveria duke kërkuar që situata të ndryshojë dhe të jetë në nivelet e shteteve fqinje si Kosova apo Maqedonia e Veriut.

Kërkojmë djersën tonë, asgjë më tepër nuk po kërkojmë“, thotë një tjetër protestues teksa ishin në pritje të një përgjigjeje nga institucionet përkatëse.

Citizens Channel ka raportuar edhe më parë situatën në të cilën gjendet fermerët e qarkut të Fierit. Ata janë shprehur se janë në prag të falimentimit, në mungesë të tregut dhe mbështetjes nga institucionet në rast të dëmtimeve të prodhimit nga kushtet atmosferike.

Duke u ndalur konkretisht në kërkesat e tyre, shoqata “Fermerët e Myzeqesë” ka publikuar një njoftim në datën 21.10.2019 ku bëri me dije se do zhvillohej tubimi i radhës lidhur me pakënaqësitë e tyre rreth situatës aktuale të cilat u përkthyen në pesë pika drejtuar Ministrisë së Bujqësisë dhe Zhvillimit Rural. Në letrën e bërë publike fermerët shprehen se situata në të cilën ata ndodhen është produkt i politikave të këqija dhe si rrjedhojë duhen ndërruar.

Nuk janë kërkesa për shtesë fondesh, janë kërkesa për rregullim ligji. Janë kërkesa minimale“, tregon më tej një nga protestuesit para godinës së Ministrisë së Bujqësisë.

Konkretisht, pesë kërkesat e tyre kanë të bëjnë me mbështetjen financiare dhe subvencion të çdo njësie produkti të hedhur në treg; kompensim financiar me çmim dysheme të tregut për produktet e humbura nga fatkeqësitë natyrore; rregullim në paketën fiskale 2020 të shkallës së TVSH-së për sektorin e tregtimit dhe përpunimit të produkteve bujqësore e blegtorale; garantim në shërbimin e ekstensionit me specialistët e Drejtorive Rajonale të Bujqësisë, laborator për analiza të tokës, garantim dhe monitorim të cilësisë së imputeve bujqësore, kontroll dhe monitorim të cilësisë së produkteve tona nëpërmjet një laboratori të akredituar dhe rregullimin me ligj të kushteve dhe mënyrën e kryerjes së tregtisë me produktet bujqësore për të garantuar interesat e palëve në këtë treg.

*Citizens Channel/Entenela Ndrevataj 

Marrëveshja e Parisit: Trump konfirmon se SHBA-ja do largohet nga marrëveshja për klimën

Nga: Roger Harrabin / BBC

SHBA përfundimisht do të tërhiqet nga marrëveshja e klimës në Paris, ka konfirmuar presidenti Trump.

Ai e bëri njoftimin gjatë një konferencë për energjinë në Pittsburgh në një skenë mbushur me persona që mbanin kaska në kokë.

Ai e përshkroi marrëveshjen si një marrëveshje të keqe dhe tha se politikat e tij pro fosileve të karburantit i kishin bërë SHBA-në një superfuqi energjetike.

Data 4 nëntor është dita më e afërt ku ai mund të fillojë procesin e largimit të SHBA-së nga marrëveshja e Parisit.

Tërheqja do të hyjë në fuqi një vit më vonë – një ditë pas zgjedhjeve presidenciale të SHBA-së në vitin 2020 – duke supozuar se Trump është rizgjedhur.

Marrëveshja e Parisit bashkoi 195 kombe në betejën për të luftuar ndryshimet klimatike.

Ajo angazhon SHBA-në në shkurtimin e gazrave serrë në 28% deri në vitin 2025, bazuar në nivelet e 2005-ës.

Presidenti Trump tha se nëse nuk do mund ta përmirësonte atë marrëveshje ai do të dilte nga ajo, por burimet diplomatike thanë se nuk ka pasur asnjë përpjekje të madhe për rinegociim.

Misioni  kërko dhe shkatërro 

Ndërkohë, stafi i presidentit ka kryer atë që kritikët e quajnë një mision kërkimi dhe shkatërrimi përmes legjislacionit amerikan të mjedisit.

Trump premtoi se do ta kthejë SHBA-në në një superfuqi energjetike dhe ai po përpiqet të heqë një pjesë të legjislacionit në lidhje me ndotjen në mënyrë që të ulë koston e prodhimit të gazit, naftës dhe qymyrit.

Ai i kategorizoi planet e ish-presidentit amerikan Barack Obama për mbrojtjen e mjedisit si një luftë për energjinë amerikane.

Trump, duke folur në një konferencë në Pittsburgh, është zotuar të heqë kontrollimin në industrinë e naftës dhe gazit

Industritë e gazit dhe të naftës janë vërtetë duke lulëzuar por premtimi i zotit Trump për të ringjallur industrinë e qymyrit ka treguar që është shumë më sfiduese.

Qymyri nuk mund të konkurrojë me gazin përsa i përket çmimit – ose, lidhur me këtë çështje, me energjinë e rinovueshme, kostot e të cilave janë ulur.

Firmat gjithashtu nuk kanë dëshirë të investojnë miliarda në industrinë e qymyrit, të cilat mund të kenë një vazhdimësi të kufizuar nëse administrata tjetër do t’i bashkohet pjesës tjetër të botës për ndryshimet klimatike.

Ndërsa qymyri është karburanti më ndotës, problemet e industrisë kanë mbajtur brenda limitit emetimet e SHBA-së, kundrejt politikave të presidentit.

Presidenti Trump i ktheu mbështetjen e industrisë së qymyrit një premtim kryesor gjatë zgjedhjeve

Për më tepër, shumë shtete, qytete dhe biznese amerikane mbeten të përkushtuara ndaj Marrëveshjes së Parisit, çfarëdo që të bëjë Trump.

Bërësit e fushatave thonë se ata përfaqësojnë tani gati 70% të GDP-së (Prodhimi i Brendshëm Bruto) së SHBA-së dhe afro 65% të popullsisë amerikane. Nëse ata do të ishin një shtet, ky grup do të ishte ekonomia e dytë më e madhe në botë.

Rebelët udhëhiqen nga Kalifornia, të cilët janë në beteje me presidentin lidhur me planet e tij për të shfuqizuar standardet e tyre për një ajër më të pastër.

Efekti i Trump-it

Deri më tani, efekti negativ më i madh i qëndrimit të Trump-it ka ndikuar në uljen e presionit ndaj vendeve si Brazili dhe Arabia Saudite për të ndërmarrë veprimet e tyre.

Ambientalistët thonë që Z. Obama do të kishte vepruar shpejt për të nxitur presidentin e Brazilit Jair Bolsonaro për të trajtuar situatën e zjarret në pyjet e Amazonës, për shembull.

Obama u pajtua në Paris se SHBA-ja duhet të marrë një drejtimin mbi ndryshimet klimatike sepse kontribuon shumë më tepër se çdo komb tjetër në gazrat serë tashmë në atmosferë.

Një kamion i ngarkuar me qymyr në një minierë afër Cumberland, Kentucky

Kina – aktualisht një ndër emetuesit më të mëdhenj  – dhe India ende e kanë relativisht të ulët emetimin për frymë por Trump tha se ato shtete nuk duhet të lejohen të reduktojnë karburantet fosile më ngadalë sesa SHBA-ja.

Ai tha: “Marrëveshja e Parisit do t’i kishte dëmtuar prodhuesit amerikanë me kufizime të tepërta rregullatore në një mënyrë të pabesushme, teksa prodhuesit e huaj lejohen të ndosin pa u ndëshkuar“.

Ajo që ne nuk do të bëjmë është të ndëshkojmë popullin amerikan teksa pasuron ndotësit e huaj“, tha ai, duke shtuar: “Jam krenar ta them – Amerika na radhë të parë!“.

Kundërshtarët e tij paralajmërojnë se presidenti po dobëson udhëheqjen globale të SHBA-së mbi ekonominë e pastër që përdor teknologji për të rritur energjinë e erës dhe diellit, bateritë e përparuara dhe ruajtjen e energjisë.

Neera Tanden, nga Qendra Librale për Progresin Amerikan, tha: “Në vend që të krijojë fuqi, ky veprim dobëson Amerikën në skenën botërore dhe heq dorë nga udhëheqja e ndryshimeve klimatike dhe sfidat e tjera të kohës sonë në vendet si Rusia dhe Kina“.

Në fakt, udhëheqja kineze për këtë çështje është heshtur kohët e fundit pasi politikanët atje po përqendrohen në shmangien e një recesioni.

Një shkatërrim për diplomacinë amerikane

 Qeveria e Pekinit po has vështirësi për të bindur drejtuesit e krahinave që të braktisin industrinë e qymyrit për të cilat ata kanë marrë kredi të rënda.

Ata janë gjithashtu të angazhuar në një program masiv ndërtimi të aeroportit për të stimuluar rritjen ekonomike. Kritikët thonë se kjo është e papajtueshme me shqetësimin për klimën.

Ndërsa ngjarjet ekstreme të motit alarmojnë shkencëtarët e botës, diplomatët do të takohen brenda disa javësh në Kili për të kuptuar rrugën përpara.

Andrew Light, një ish zyrtar i Departamentit të Shtetit gjatë administratës së Obamës i cili ndihmoi me organizimin e Marrëveshjes së Parisit, tha se tërheqja zyrtare do ta bënte të vështirë për SHBA-në që të ishte pjesë e bisedës globale.  

Do të duhet pak kohë për t’u rikuperuar nga ky kaotizëm në diplomacinë amerikane“, tha ai.

*Citizens Channel/Entenela Ndrevataj

Kopshti Botanik: Universiteti fiton betejën e parë gjyqësore

Seanca gjyqësore e radhës mes Universitetit të Tiranës si palë paditëse dhe qeverisë u zhvillua ditën e sotme në orën 12:00 dhe u përmbyll me vendimin se padia është legjitime dhe çeshtja tashmë mund të kalojë në gjykim. Ky vendim bazohet në Ligjin Nr.80/2015 për Arsimin e Lartë që i garanton universitetit autonomi të plotë. Bashkia Tiranë kishte kërkuar më herët që padia e Universitetit të Tiranës të mos pranohej. Në seancat e ardhshme do të përcaktohet nga gjykata nëse kopshti botanik do t’i kalojë bashkisë apo do të qendrojë pronë e Universiteti të Tiranës. 

Sipas ligjit nr 80/2015 “Për arsimin e lartë dhe kërkimin shkencor në institucionet e arsimit të lartë në Republikën e Shqipërisë, neni 3/pika 3/D garanton autonominë e Universitetit të Tiranës dhe i garanton institucionit lirinë e plotë për të administruar pasuritë e luajtshme dhe të paluajtshme që ka në pronësi.

Gjatë zhvillimit të kësaj seanca, studentë dhe pedagogë u mblodhën para Gjykatës dhe qëndruan aty deri në përfundim të saj. Alfred Mullaj, pjesë e Qendrës Kërkimore të Florës dhe Faunës tregon për Citizens Channel pse ai kopsht duhet t’i qëndrojë në pronësi Universitetit të Tiranës.

Është një laborator në natyrë i studentëve të biologjisë, jo vetëm i FSHN-së por i të gjithë universiteteve të rretheve, të Gjirokastrës, Shkodrës.  Ata vijnë e bëjnë praktikat në terren për njohjen, sepse ka një florë të pasur, 1600-1700 specie së Shqipërisë të introduktuara brenda Kopshtit botanik“, shpjegon ai.

Alfred Mullaj, pjesë e Qendrës Kërkimore të Florës dhe Faunës/FSHN

Mullaj krahason më tej Shqipërinë me shtetet e tjera dhe informon se kopshte të kësaj natyre ruhen dhe mbrohen pikërisht për vlerat që mbartin në aspektin studimor dhe shkencor.

Kopshti botanik në Shqipëri është objekt unikal që i përket Universitetit të Tiranës. Kroacia ka katër kopshte botanike, një shtet si Franca po them, mund të ketë 50-60 kopshte botanike. Ne një kemi dhe atij duan t’ia heqin atë emër që ka“, arsyeton më tej zoti Mullaj.

 “Shqipëria evropiane pa kopsht botanik”, është mesazhi i shkruar ne pankartën e një studenteje, e cila shprehet: “Ne na nevojitet një kopsht botanik dhe jo një park argëtimi. Është i vetmi vend ku studentët e shkencave të natyrës, sidomos dega e biologjisë mund të bëjë praktikë. Ka bimë endemike që nuk gjenden në rajone të tjera të Shqipërisë. Studentët nuk i besojnë më termave për rinovim ambienti dhe premtimeve e fjalëve  boshe, pasi e kemi parë tashmë çfarë është bërë me ambiente të tilla. Janë kthyer në parkingje e janë ngritur kulla”.

Po të njëjtin qëndrim ndan edhe Kristiana Mano, ish-studente e Fakultetit të Shkencave të Natyrës dhe aktiviste e lëvizjes Për Universitetin. Ajo ndan përvojat personale dhe rolit që ka pasur Kopshti Botanik gjatë viteve të saja universitare.

Megjithëse i kam mbaruar studimet, vazhdoj të jem natyrisht e interesuar edhe sepse e di rëndësinë që ka kopshti botanik për FSHN-në. Ne aty kemi zhvilluar lëndë kryesisht të profilit të botanikës, vetë ai vend për studentët e shkencave të Natyrës ka qenë pjesë e fakultetit dhe është jashtë çdo sensi logjik që të përdoret nga kushdo ent tjetër“, tregon Kristiana për Citizens Channel.

Mano shprehet dyshuese ndaj aftësive menaxheriale që mund të zotërojnë persona të jashtëm të cilët nuk janë pjesë e profesionistëve që i kanë shërbyer prej vitesh Kopshtit Botanik.

Ka dëmtime në parqe që po rikonstruktohen në brendësi të Tiranës. Në parkun Rinia kanë prerë pemë pa lidhje thjesht sepse ideja e tyre është, në një farë mënyre, jo shumë afër natyrës dhe sesi funksionon ajo“, përfundon ajo.

Kristiana Mano, ish studente e FSHN-së dhe aktiviste e lëvizjes Për Universitetin

Në protestën para administratës, si pjesë e stafit akademik ka marrë pjesë edhe pedagogia dhe ish deputetja e kuvendit të Shqipërisë, zonja Mimoza Hafizi e cila është shprehur kundër këtij vendimi për kalimin e kopshtit në pronësi të Bashkisë.

“Nuk jam dakord dhe do rezistojmë studentë e pedagogë bashkë që ky akt grabitjeje të mos realizohet. Duke parë që çdo sipërfaqe është mbjellë me pallate në Tiranë, nuk dyshoj në qëllimin që ekziston për kopshtin botanik. Duhet të mbrojmë vlerën e universitetit që është ngritur me dekada. Ne rezistojmë dhe nuk duam të lejojmë që ky kopsht të tjetërsohet. Vështirë të them se kam besim te gjykata, por më pëlqen fakti që ka rezistencë“.

*Citizens Channel/E.k/E.N/

Teatri Kombëtar, në garë për një nga 7 objektet kulturore më të rrezikuara në Evropë

 “E kemi nominuar Tetarin Kombëtar për programin e Europa Nostra, shtatë vendndodhjet më të rrezikuara të trashëgimisë në Evropë dhe presim që në ditët e ardhshme të kemi edhe një vendim final prej tyre”, u shpreh arkitekti Kreshnik Merxhani në një video të shpërndarë në faqen zyrtare të Aleancës për Mbrojtjen e Teatrit në Facebook. 

Ai është pjesë e delegacionit shqiptar i cili ndodhet në Paris, në Konferencën e Europa Nostras ku ka fituar garancinë nga figurat drejtuese të organizatës që Teatri Kombëtar përfshihet në listën e ngushtë të 14 vendndodhjeve të trashëgimisë kulturore më të rrezikuara në Evropë.

 

Nëse Teatri do të mund të përfshihet në listën e shtatë vendndodhjeve më të rrezikuara atëherë organizata europiane e fokusuar në mbrojtjen e trashëgimisë kulturore, Europa Nostra, do të ketë mundësi të sigurojë projekte restauruese të godinës. Sipas përfaqësuesve të delegacionit shqiptar në këtë konferencë, do të zhvillohet një prezantim i gjithë rrugës së ndjekur deri më tani për Teatrin Kombëtar.

Aleksandër Gjonaj ndodhej sot në mjediset e Teatrit Kombëtar. I entuziazmuar nga lajmi, ai tregon si janë bërë përgatitjet nga vetë Aleanca për Mbrojtjen e Teatrit dhe çfarë materialesh janë vendosur të paraqiten në konferencën që po zhvillohet në Paris.

Aleksandër Gjonaj, pedagog dhe pjesë e Aleancës për Mbrojtjen e Teatrit

“Arkitektët në radhë të parë kanë përgatit materiale që kanë të bëjnë me aspektin teknik të problemit. Është paraqit arkitektura siç është projektuar nga arkitekti italian, si ka qenë projekti fillestar, çfarë ndryshimesh janë bërë mbrapa dhe gjendja reale që është sot”, shprehet zoti Gjonaj gjatë intervistës së dhënë për Citizens Channel.

Ai ka qenë i pranishëm gjatë përzgjedhjes së materialeve dhe tregon se në video-prezantimin e bërë pranë Europa Nostra-s janë integruar fjalime dhe pamje nga protestat e zhvilluara gjatë gjithë procesit në mbrojtjes të godinës, çka e bën atë material mjaft të veçantë në sytë e tij.

“Përveç këtyre aspekteve teknike, materiali jonë ka pas një gjë krejt të veçantë, ka pas edhe protesta popullore. Me qindra dhe mijëra protestues, qytetarë të Tiranës, i kanë dalë në mbrojtje Teatrit”, tregon më tej ai.

Teatri Kombëtar është i vizituar dhe i jetësuar gjatë çdo momenti të ditës. Lindita Komani ishte sot brenda ambienteve të saj, duke u përgatitur për veprën e radhës që do të vihet në skenë në kuadrin e festivalit në mbrojtje të Teatrit Kombëtar. Ajo tregon për Citizens Channel se e ka mirëpritur një lajm të tillë.

Lindita Komani, pjesë e Aleancës për Mbrojtjen e Teatrit

Në kuadër të këtij programi i thuhet një lloj stop-i, nuk është stop zyrtar se ata nuk mund të detyrojnë shtetin shqiptar mos ta bëjë diçka por është një fuqi shumë e madhe kulturore e politike që vjen nga vendimi i tyre“, artikulon zonja Komani.

Prandaj do të ishte e mirëpritur, se ata garantojnë që ka dhe mbështetje financiare për të bërë restaurimin e Teatrit që do të ishte gjë akoma dhe më e madhe”, sqaron në vijim ajo.

Duke kuptu këtë rëndësi të këtij objekti, unë mund të them me plot gojën që ky objekt, në mënyrë absolute nuk duhet të preket as me majën e gishtit. Këtu është historia, gjithë historia e institucioneve kulturore të shtetit shqiptar, institucioneve kulturore kombëtare“, arsyeton më tej zoti Gjoni gjatë intervistës së tij. Ruajtja e Teatrit Kombëtar dhe atij Eksperimental, në këndvështrimin e tij, është jetike, jo vetëm për kulturën dhe historinë por edhe për demokracinë në Shqipëri.

Çfarë është Europa Nostra?

Europa Nostra është një lëvizje e qytetarëve për të mbrojtur trashëgiminë kulturore dhe natyrore të Evropës. Ajo u themelua më 29 nëntor 1963 në Paris dhe ka 50 vite që mbron dhe lobon për trashëgiminë kulturore. Në këtë organizatë marrin pjesë përfaqësues nga 40 vende të Evropës dhe ka një status këshillimor për UNESCO-n dhe BE-në sa i përket siteve kulturore dhe trashëgimore. 

*Citizens Channel/E.K/E.N/

Në gjyq me bashkinë, studentët dhe pedagogët protestojnë për Kopshtin Botanik

Ditën e sotme pranë Gjykatës Administrative të Apelit u zhvillua protesta nga studentë dhe pedagogë të Universitetit të Tiranës, të cilët kundërshtuan planin e bashkisë për të kaluar nën administrim Kopshtin Botanik.

Në të njëjtën kohë zhvillohej seanca gjyqësore e cila u shty pasi kishte mungesë të përfaqësimit nga pala e qeverisë si palë e paditur. Në atë seancë do merrej në shqyrtim padia e Universitetit të Tiranës në lidhje me VKM-në 510, të datës 17 korrik 2019.

Aleko Miho, pedagog prej më shumë se 30 vitesh në Fakultetin e Shkencave të Natyrës ishte i pranishëm në protestë. Ai shprehet për Citizens Channel se VKM-ja e miratuar është në kundërshtim me vetë ligjin e arsimit të lartë.

Është një shkelje e ligjit të arsimit të lartë kjo që ka ndodhur. Ata nuk kanë marrë parasysh autonominë universitare që vetë ligji e jep për pronat që ka në administrim. Pronat nuk mund të jepen nëse nga vetë institucioni nuk ka një kërkesë që t’i kalojë bashkisë“, artikulon ai.

Aleko Miho, pedagog në Fakultetin e Shkencave të Natyrës

Sara Aliu, një nga studentët pjesëmarrës në protestë shprehet se është skeptike rreth vijueshmërisë së Kopshtit Botanik pas administrimit nga bashkia Tiranë.

“Në qoftë se është për fakultetin, universiteti do të përdorë për studime shkencore dhe nuk do ta shkatërrojë atë jeshile që është aty. Në qoftë se është për bashkinë, nuk i dihet fundi“, shpjegon ajo për Citizens Channel.

Të njëjtat hije dyshimi shoqërojnë edhe pedagogun Aleko Miho i cili është përgjegjës për kërkimin shkencor të botanikës. Ai ndan rastet të tjera ku hapësirat të tjera të marra nën administrim nga bashkia kanë humbur pjesë të territorit ose janë ndërtuar kulla.

Bashkia ka ndërtuar tek oborri kopshtit tonë, tek oborri i fakultetit. Ishte oborri i fakultetit dhe ne kishim parashikuar një shtesë të Fakultetit të Shkencave që ka shumë nevojë. Jo, u ndërtua një kullë betoni. Po të njëjtin fat ka Muzeu i Shkencave, ishte 4500 metra dhe u bë 3 herë më pak“, vijon pedagogu Miho.

Për rëndësinë e Kopshtit Botanik tregon edhe Jani Marka, pegagog i Departamentit të Biologjisë. Ai shpjegon se Kopshti Botanik duhet të vazhdojë të administrohet nga Universiteti i Tiranës.

Qysh nga dita e parë e lindjes së tij në vitet 1960 dhe është gjithashtu Institucion i Rëndësisë së Veçantë (i shpalluar me ligj në vitin 1999). Në këtë kuptim, është historia jonë, shtëpia jonë. Dhe as historinë tonë dhe as shtëpinë tonë nuk mund të na i rrëmbejë Bashkia e Tiranës përmes Ministrisë së Arsimit Sportit dhe Rinisë“, informon ai gjatë intervistës së dhënë për Citizens Channel.

Jani Marka, pedagog pranë Fakultetit të Shkencave të Natyrës

Projekti i bashkisë konsiston në shkrirjen e Kopshtin Botanik me atë Zoologjik nën një hapësirë të vetme. Sipas pedagogut Miho kjo shkrirje nuk mund të bëhet pasi hapësirat janë të ndryshme për sa i përket funksionit të tyre.

Kopshti Zoologjik është kopsht me karakter çlodhës, edukativ. Kopshti Botanik është institucion shkencor, nuk është një hapësirë ku ti mund të shkosh të bësh piknik, të lozësh, të çlodhesh”, duke argumentuar më tej se Kopshti Botanik mban mbi 4000 lloj bimësh të cilat kanë nevojë për menaxhim nga persona të specializuar.

Nën të njëjtën vijë mendimi është edhe pedagogu Jani i cili mendon se funksioni i Kopshtit Botanik ka karakter shkencor dhe mësimor.

Kopshti është institucion me natyrë shkencore dhe mësimore. Këto veprimtari mund t’i ofrojë vetëm Universiteti. Kopshti nuk është park për të luajtur futboll banorët e lagjes, por vend për hulumtime shkencore, mësim dhe edukim“, shprehet Jani Marka.

Veliaj kundër akademikëve: “Jeni të paaftë të menaxhoni”

Gjatë një mbledhjeje të Këshillit Bashkiak, kryetari i bashkisë Erion Veliaj është shprehur rreth seancës gjyqësore, ku më tej lëshoi akuza kundrejt rektorit Mynyr Koni si i paaftë për të menaxhuar hapësirat e universitetit të cilat sipas tij janë tjetërsuar vetëm pas marrjes nën administrim të bashkisë Tiranë.

Sot ka një seancë gjyqësore për çështjen e pronësisë së Kopshtit Botanik për të cilën bashkia e Tiranës ka hipotekë.  Kopshti Botanik ka qenë një nga hapësirat më të bukura në Tiranë ndërkohë që sot është kthyer në një landfill plehrash në mes të Tiranës. Qartazi, Universiteti i Tiranës si dhe shumë punë të tjera, është komplet i paaftë ta menaxhojë“, u shpreh Veliaj.  

*Citizens Channel/E.K/E.N

Bashkia “rrëmben” pronësinë e Kopshtit Botanik, Dekanati kundër këtij vendimi

Përvojat e hidhura të deritanishme të Fakultetit tonë me Muzeun e Shkencave të Natyrës, Departamentin e Bioteknologjisë, “ngrënien” e parakohshme të një cope nga Kopshti në fjalë së bashku me godinën dykatëshe dhuratë nga Ambasada Amerikane), për kalimin e Unazës së Re, nuk japin asnjë garanci, përkundrazi, flasin në të kundërt të ndonjë mundësie të realizimit të funksionit dhe misionit të Kopshtit Botanik nga ndonjë institucion tjetër jashtë Universitetit të Tiranës”, – thuhet në deklaratën për shtyp të Dekanatit të Fakultetit të Shkencave të Natyrës (FSHN).

FSHN u shpreh kundër vendimit për kalimin e Kopshtit Botanik në pronësi të Bashkisë Tiranë, duke theksuar se ky vendim jo vetëm që cënon rënde autonominë dhe lirinë akademike, duke renë ndesh edhe me ligjin për Arsimin e Lartë, por pamundëson edhe funksionin e këtij institucioni që është një punë 60 vjeçare ndër breza.

Ky reagim është hapi i parë zyrtar dhe publik i Fakultetit të Shkencave të Natyrës së Universitetit të Tiranës që kundërshton këtë vendim, me besimin që reagimi i Qeverisë për tërheqjen e tij të jetë sa më i shpejtë. Fakulteti i Shkencave të Natyrës shprehet i vendosur se do të marrë të gjitha masat që të mbrojë Lopshtin Botanik si aset kombëtar kërkimor dhe mësimor të pazëvëndësueshëm. 

Reagimi institucional i Fakultetit të Shkencave të Natyrës vjen pas vendimit të Këshillit të Ministrave më 17 korrik 2019, ku Kopshti Botanik i kaloi në pronësi Bashkisë së Tiranës. Më datë 22 korrik 2019 Fakulteti zhvilloi një mbledhje të jashtëzakonshme për të marrë në shqyrtim vendimin e Këshillit të Ministrave. Me anë të këtij vendimi, Universitetit të Tiranës i hiqet pronësia mbi Kopshtin Botanik , duke u shndërruar në pasuri të paluajtshme të Bashkisë Tiranë.

Kopshti i cili deri më tani ekzistonte si një pronë shtetërore nën administrimin e Universitetit të Tiranës, shndërrohet në një pronë lokale, ku Bashkia ka të drejtë ta përdorë atë për funksionet e veta.

Në pikën 2 të vkm-së  numër 510, të miratuar më datë 17 korrik 2019 “Për kalimin në pronësi të Bashkisë Tiranë, të disa pasurive të paluajtshme në zonën kadastrale 3292, (kopshti botanik)” thuhet se Bashkia Tiranë bashke me Universitetin e Tiranës lidhi kështu një marrëveshje që i mundëson Universitetit të Tiranës ushtrimin e aktivitetit mësimor dhe të veprimtarive kërkimore-shkencore në ambjentet e Kopshtit Botanik.

Deklarata për shtyp e Dekanatit të Fakultetit të Fakultetit të Shkencave të Natyrës

Mynyr Koni, rektori i Universitetit të Tiranës, në një deklaratë për shtyp theksoi se me anë të një shkrese në tetor të vitit 2018, Bashkia Tiranë kërkoi organizimin e një takimi të përbashkët për të folur rreth projektit të rikonceptimit dhe rehabilitimit të Kopshtit Zoologjik dhe hapësirës publike duke dashur të integronin edhe territorin e Kopshtit Botanik. Pas takimit të zhvilluar, Bashkia Tiranë ra dakord të përcillte draft-marrëveshjen në lidhje me këtë çështje, e cila përmbante kalimin e Kopshtit Botanik në pronësi të bashkisë, gjë që u refuzua të nënshkruhej nga Fakulteti pasi nuk kishte mbështetje ligjore.

“Dua të bëj me dije se, brenda afateve të parashikuara ligjore, Drejtoria Juridike e UT ka hartuar kërkesë padinë me objekt: Shfuqizimin e VKM nr.510 datë 17.07.2019, e cila është depozituar në Gjykatën Administrative të Apelit, Tiranë, në datën 07.08.2019”, shprehet rektori i Universitetit të Tiranës, Mynyr Koni.

Kopshti Botanik i Tiranës filloi të ndërtohej në vitin 1964 dhe përfundoi në 1971. Kopshti kia si qëllim kryesor njohjen dhe ruajtjen e florës së Shqipërisë dje llojeve të ndryshme bimore të rrezikuara. Ai zotëron një sipërfaqe prej rreth 15 ha, në të cilën rritet një diversitet bimësh, me rreth 1400 lloje të tyre, që i përkasin më së shumti vendit tonë.

*Citizens Channel /E.K/

Aleanca për Mbrojtjen e Teatrit kallëzon në Prokurori Arbër Maznikun dhe biznesmenin Shkëlqim Fusha

Aleanca për Mbrojtjen e Teatrit ka kallëzuar në Prokurorinë e Tiranës, nënkryetarin e Bashkisë Tiranë, Arber Mazniku dhe administratorin e kompanisë Fusha sh.p.k ,Shkëlqim Fusha për kryerjen e vepres penale, atë të korrupsionit.

Sipas Aleancës, në muajin gusht të vitit 2019 është publikuar online një faturë, e cila është paguar me kartë krediti nga shtetasi Shkëlqim Fusha në favor të shtetasit Arbër Mazniku për qendrimin në hotelin “Alma Barcelona” në Barcelonë të zotit Mazniku. Fatura është paguar për dy netë qëndrimi dhe bëhet fjalë për një shifër 1816 euro për qëndrimin në datat 19 dhe 20 qershor 2019.

Fatura e paguar për Arbër Maznikun

Sipas Aleancës për Mbrojtjen e Teatrit kjo faturë nuk është paguar as nga firma Fusha për Bashkinë Tiranë dhe as nga delegacioni siç pretendon bashkia, por nga karta personale e zotit Fusha për zotin Mazniku.

“Ligji nr.9367 dt.07.04.2005 për parandalimin e konfliktit të interesave  për ushtrimin e funksioneve publike në nenin 23 i përcakton : Ndalimi i marrjes së dhuratave, favoreve, premtimeve ose trajtimeve preferenciale . Është e ndaluar që një zyrtar të kërkojë ose të marrë në mënyrë të drejtpërdrejtë ose tërhore dhurata, favore, premtime ose trajtime preferenciale të cilat jepen për shkak të pozicionit të tij nga një individ person fizik ose person privat. Nënkryetari i Bashkisë, Ardian Mazniku ka shkelur detyrimin për deklarimin e kësaj dhurate pranë ILDKPI-së në formularin periodik vjetor të interesave private ashtu siç përcaktohet në faqen 8 të formularit. Nënkryetari i Bashkisë Tiranë ka vepruar në kushtet e konfliktit të interesit , duke shkelur ligjin 9367, i datës 07.04.2005 për parandalimin e konfliktit të interesave për ushtrimin e funksioneve publike” -thuhet në kallëzimin drejtuar Prokurorisë së Tiranës. 

Aleanca ka kërkuar nga Prokuroria e rrethit gjyqësor Tiranë fillimin e një procedimi penal.

Ne kallëzuesit nga prokuroria e rrethit gjyqësor  Tiranë kërkojmë, fillimin e procedimit penal në ngarkim të zotit Ardian Mazniku, në cilësinë e nëkryetarit të Bashkisë Tiranë, dhe zotit Shkëlqim Fusha në cilësinë e ortakut të vetëm dhe administratorit të shoqërisë Fusha sh.p.k për kryerjen e veprës penale, shpërdorim detyre dhe të korrupsionit aktiv dhe pasiv, parashikuar nga nenet përkatëse të paraqitura në objektin e kallëzimit.


 

Përfaqësuesi i Aleancës për Mbrojtjen e Teatrit Kombëtar, Ervin Goci në lidhje më këtë ceshtje është shprehur se rasti i Teatrit Kombëtar është një rast flagrant vjedhjeje dhe grabitjeje, dhe marrja e parave nga firma Fusha është për të dhënë tendera dhe për të favorizuar në kushte të pabarabarta me aktorë të tjerë të ndershëm që ka shoqëria shqiptare.

“Kjo firmë ka fituar rreth 49 tendera në 4 vite, në Bashkinë Tiranë dhe me qeverinë qendrore. Nga këto 49 tendera, diku 30 e ca janë pa garë fare. Këtu kemi raste të jashtëzakonshme për të hapur një hetim. Ne duam që të hapet nje hetim nga prokuroria, dhe kemi hyrë për çeshtjen e Teatrit Kombëtar, nuk duam ta devijojmë këtë thjesht si një ceshtje mes zotit Mazniku dhe zotit Fusha. Ne duam të hapet e gjithë dosja e Teatrit Kombëtar dhe të nxirren të gjitha faktet që kompromentojnë këta individë për çeshtjen e Teatrit Kombëtar.”

Kompania Fusha sh.p.k është përmendur shpesh për marrjen e një sërë tenderash për shumë projekte publike në Tiranë, por edhe në Shqipëri. Ndërkohë është edhe kompania së cilës i është dhënë për ndërtim Teatri Kombëtar, ku parashikohen të ngrihen edhe kullat shumëkatëshe. 

Sikundër ka raportuar edhe më herët Citizens Channel, më 27 qershor 2018 Këshilli i Ministrave propozoi projektligjin “Për përcaktimin e Procedurës së Veçantë për Negocimin dhe Lidhjen e Kontratës” me objekt “Projektimi dhe Realizimi i Projektit Urban dhe Godinës së Re të Teatrit Kombëtar”

Në këtë projektligj thuhet se Ministria e Kulturës nuk ka fonde për të kryer këtë investim. Kështu, Bashkia Tiranë me një kërkesë të datës 23.2.2018 drejtuar Ministrisë se Kulturës, shpreh interesin që të zhvillohet zona pranë Teatrit Kombëtar nga kompania “Fusha” sh.p.k. Ky subjekt privat përveç zhvillimit të zonës angazhohet të realizojë edhe ndërtimin e godinës së re të Teatrit Kombëtar.

 

*Citizens Channel /E.K/ 

 

Protesta qytetare: Të dorëhiqet deputeti që përdori gjuhë urrejtje ndaj individëve me sindromë Down

Fëmija im të jep vetëm kënaqësi, nuk të bën për të vjellë kur flet“, tha Enkeleda Pillati, nënë e një fëmijë me sindromën Down.

Ajo ishte një nga dhjetëra qytetarët që e pritën me protesta parakalimin e makinave luksoze të deputetëve, që nxitonin për të marrë pjesë në çeljen e sesionit të ri Parlamentar.

Protesta e organizuar dje nga Down Syndrome Albania (DSA), lindi si reagim ndaj një komenti të bërë nga nënkryetari i Kuvendit dhe njëkohësisht deputet i Parlamentit të Shqipërisë, Myslim Murrizi. Ai ka replikuar me një komentues në profilin e tij duke përdorur gjuhë urrejtje dhe diskriminimi ndaj personave të lindur me sindromë Down.

Screenshot i replikës së deputetit Myslim Murrizi, marrë nga Down Syndrome Albania

Çfarë është sindroma Down?
Në çdo qelizë në trupin e njeriut ekziston një bërthamë ku materiali gjenetik ruhet në gjene. Ato mbajnë kodet përgjegjës për të gjitha tiparet tona të trashëguara dhe grupohen në një strukturë në formë spiraleje, të quajtura kromozome. Bërthama e secilës qelizë përmban 23 çifte kromozomesh, gjysma e të cilave trashëgohen nga secili prind. Sindroma Down ndodh kur një individ ka një kopje shtesë të plotë ose të pjesshme të kromozomit 21. Nuk ka një arsye të vërtetuar shkencërisht se çfarë e shkakton këtë sindromë. Mosha e lindjes është faktori i vetëm i cili mendohet se rrit mundësitë e pasjes së një fëmije me sindromën Down.

 

Jam sot këtu si nënë e dy fëmijëve që në fakt nuk e kanë atë kromozomin special . Besoj që shtypja apo diskriminimi që i bëhet këtyre fëmijëve nga politikanët kryesisht është krejt e padrejtë”, shprehet për Citizens Channel Egla Gollaj. “Presim që zoti Murrizi të japë dorëheqjen, sepse ka ofenduar dhe diskriminuar diagnozën të cilët këta njerëz apo fëmijë kanë ” vijon më tej ajo.

Egla Gollaj, pjesëmarrëse në protestën e zhvilluar para parlamentit

Ditën e sotme, Myslim Murrizi ka dhënë një deklaratë për media duke kërkuar falje për gjuhën e përdorur  gjatë komunikimit me komentuesin në profilin e tij në Facebook. Ndër të tjera ai ka theksuar se është e drejta e tyre të ngrenë zërin por ekzistojnë shumë probleme të tjera sociale dhe ekonomike për të cilat mund të protestohet. 


Me datë 27 gusht, pasi komenti me përmbajtje gjuhësore diskriminuese kishte ngjallur reagimet e para,  po në rrjetin social Facebook deputeti i Parlamentit të Shqipërisë, zoti Murrizi ka postuar një video të shoqëruar me një mbishkrim me nota tallëse. Edhe në këtë postim ai vazhdon të ruajë ciklin e gjuhës së dhunës dhe urrejtjes, ndryshe nga deklarata e ditës së sotme, dhe i bën ftesë personave që janë ndjerë të bezdisur, mërzitur, fyer apo të denigruar të mos i lexojnë shkrimet e tij.

 

Down Syndrome Albania ka nisur një peticion i cili u firmos nga qytetarët dhe aktivistët gjatë kohës që po zhvillohej protesta para parlamentit. Ky peticion i cili gjendet dhe online ka si qëllim marrjen e masave disiplinore kundrejt zotit Murrizi për gjuhën e përdorur.

“Në një moment që një prind dëgjon këtë gjuhë nga personat të cilët presupozohet që janë aty për të krijuar ligje, për të krijuar struktura, për t’i mbështetur, për t’i ndihmuar në këtë rrugë të vështirë drejt përmbushjes së potencialit, sigurisht që është një pengesë” sqaron Fatjona Hysi e cila është psikologe pranë fondacionit Down Syndrome Albania.

Fatjona Hysi, psikologe pranë Down Syndrome Albania

Personat me aftësi ndryshe janë si të gjithë ne. Duhet të jemi me ata për t’i mbështetur kur ata kanë nevojë për të shprehur potencialin e tyre maksimal”, vijon më tej psikologia Hysi.

Do jetë vetë populli dhe komuniteti që do japë fjalën e vet dhe të dënojë këtë gjuhë. Ky peticion është edhe online, ky peticion u soll edhe me shkrim sot do vazhdojë të shpërndahet dhe shpresoj të mblidhen sa më shumë [firma], e  të shprehen qartë se shtetasit shqiptarë nuk e duan këtë gjuhë”, shpjegon për Citizens Channel Mirela Juko. Mbledhja e firmave do vazhdojë edhe ditët në vijim. Nënshkrimi i peticionit është nisma pasuese, pasi fondacioni DSA fillimisht  i është drejtuar Komisionerit Kundra Diskriminimit nga ku nuk kanë marrë përgjigjen e kërkuar rreth problemit të  ngritur.

Mirela Juka, këshilluese pranë Down Syndrome Albania

Durim Pruthi ishte një ndër protestuesit e ditës së djeshme para Parlamentit të Shqipërisë. Ai është student i Juridikut dhe na informon se përdorimi i kësaj gjuhe bie ndesh me vetë Kushtetutën e Republikës së Shqipërisë.

Durim Pruthi, pjesëmarrës në protestën e organizuar para Parlamentit

Kushtetuta shkelet çdo ditë, edhe sot u shkel Kushtetuta, neni 18 i Kushtetutës së Republikës së Shqipërisë ku flitet për dinjitetin e shtetasve shqiptarë”, përfundon Pruthi. 

*Citizens Channel/Entenela Ndrevataj 

Aleanca për Mbrojtjen e Teatrit nënshkruan kontratë bashkëpunimi me Partinë Demokratike

Në ambjentet e Teatrit Kombëtar u nënshkrua sot një kontratë bashkëpunimi midis Aleancës për Mbrojtjen e Teatrit dhe Partisë Demokratike së bashku me pjesën tjetër të opozitës. Kontrata u nënshkrua nga kreu i Partisë Demokratike dhe nga artisë e aktivistë të cilët kanë protestuar dhe kanë qëndruar përditë pranë Teatrit Kombëtar për ta ruajtur dhe mbrojtur atë nga “ligji special” i cili parashikon shembjen e tij dhe ndërtimin e një teatri të ri dhe modern.

“Unë nuk e nënshkruaj atë kontratë, nëse nuk e nënshkruan i gjithë populli që është këtu”, u shpreh regjisori Edmond Budina duke iu drejtuar Bashës gjatë takimit. Ai theksoi se ajo marrëveshje është një marrëveshje midis Bashës dhe qytetarëve.

Foto: Citizens Channel

Në këtë kontratë të nënshkruar gjatë ditës së sotme Basha zotohet se do të mbrojë godinën e Teatrit Kombëtar dhe se do të “reformojë” kulturën në aspektin cilësor dhe sasior, nëse do të jetë (kur të jetë) në krye të qeverisë.

“Jemi këtu falë këtij kontributit të jashtëzakonshëm qytetar. Ajo çfarë unë vlerësoj si protestues ka qënë profili qytetar i të gjitha krahëve, i protestuesve, i partive, dhe mbase është momenti më deçiziv në demokracinë shqiptare, që për herë të parë, qytetarët po bëhen vendimmarrës në demokraci”, tha regjisori Robert Budina gjatë fjalës së tij ditën e sotme.

 

Çfarë ndodhi dje?

Mëngjesin e ditës së djeshme forca të shumta të Policisë së Shtetit u paraqitën pranë Teatrit Kombëtar. Prezenca e tyre u shtua sidomos gjatë orëve të mbasdites, në të njëjtën kohë dhe prezenca e qytetarëve protestues për kauzën e Teatrit Kombëtar u shtua.

Protesta dhe konfrontimi me forcat e policisë nisi në orën 7 të mëngjesit dhe përfundoi rreth orës 10 të darkës kur forcat e policisë u larguan në mënyrë të pashpjegueshme nga Teatri Kombëtar dhe qytetarët protestues të penguar nga kordoni policor në hyrje të teatrit u bashkuan me artistët dhe qytetarët e tjerë të cilët ishin “ngujuar” prej disa orësh në brendësi të ambjenteve të teatrit.

Basha u shfaq 2 herë ditën e djeshme në Teatrin Kombëtar duke shprehur mbështetjen e tij e cila u materializua sot nëpërmjet kontratës së nënshkruar nga të dy palët.

 

Çfarë parashikon marrëveshja?

 

“Me vendosmërinë për të kontribuar në ndërtimin e një shteti të së drejtës, të një shoqërie demokratike që garanton liritë dhe të drejtat e njeriut, me një sistem politik që garanton llogaridhënien dhe kufizimin e pushtetit, deklarojmë me përgjegjësinë tonë publike ndërmarrjen e këtij subjekti”, u shpreh regjisori Kastriot Çipi gjatë leximit të kontratës të nënshkruar nga të dy palët.

Kontrata e nënshkruar është e ndarë në disa pjesë kryesore, në radhë të parë lidhur me Teatrin Kombëtar, në radhë të dytë lidhur me masat për të garantuar demokracinë funksionale, sundimin e ligjit dhe mbrojtjen e interesit publik si dhe lidhur me  nevojën për një Reformë të vërtetë në art dhe kulturë.

Në këtë kontratë në nënshkruar Partia Demokratike zotohet se do të mbështesë Aleancën për Mbrojtjen e Teatrit në veprimet e saj në mbrojtje të Teatrit Kombëtar dhe se do të restaurojë kompleksin “Skanderbeg” në muajin e parë të qeverisjes së saj, duke hedhur poshtë gjithashtu dhe “ligjin special”.

 

Kontrata e plotë: