Protesta bashkon të gjithë studentët para Parlamentit

 

Ditën e djeshme studentët protestuan në dy kampe kryesore: një grup ishte duke protestuar pranë Kryeministrisë dhe një grup tjetër pranë Ministrisë së Arsimit dhe Sporteve.

Ditën e sotme në orën 10:00 studentët janë mbledhur të gjithë bashkë pranë Parlamentit ku po zhvillohet një seancë plenare, të cilës i janë bashkuar dhe 8 deputetë të opozitës pas shumë kohësh mungese në Parlament. Ata kërkuan amendimin për ligjin e Arsimit të Lartë, por amendimet e tyre janë rrëzuar. Rama u shpreh se ai dialogun do e ketë me studentët dhe jo me opozitën.

Edi Rama në fjalën e tij u shpreh se: “E para, protesta i dha një shuplakë qeverisë. E dyta, protesta i dha një grusht opozitës. E treta, protesta i dha një shpresë shoqërisë.”

Foto nga protesta e sotme para Parlamentit

Studentët janë të unifikuar pranë Parlamentit dhe kanë deklaruar që nuk do t’i lejojnë deputetët të dalin nga Parlamenti pa i plotësuar të gjitha kërkesat e tyre.

 

Edhe Monika Kryemadhi denoncohet për plagjiaturë; Studiuesi Muka: “Do i drejtohem prokurorisë”

Pas denoncimit nga “Lëvizja për Universitetin” ndaj Ministres së Shëndetësisë Ogerta Manastirliu, pak ditë më vonë një tjetër emër i rëndësishëm i politikës shqiptare denoncohet për plagjaturë në punimin e saj shkencor të doktoraturës. Bëhet fjalë për kryetaren e Lëvizjes Socialiste për Integrim, Monika Kryemadhi.

Valën e denoncimeve të plagjiaturave në radhën e politikanëve shqiptarë dhe të figurave të larta drejtuese nëpër universitete e nisi Taulant Muka, një kërkues shkencor i ri i cili mbjti postin e Zëvendësministrit të Arsimit për dy javë.

Shoqëria shqiptare këto ditë gjendet pranë një revoltë masive që vjen nga studentët e universiteteve të cilët kërkojnë arsim cilësor, përgjysmim tarifash studentore, kushte më të mira nëpër konvikte dhe universitete, biblioteka me standarde europiane, transparenncë në buxhet dhe verifikim të titujve akademikë dhe plagjiaturave nëpër punimet shkencore të doktoraturave.

Ndërkohë, një nga 8 pikat që studentët i kanë dorëzuar Qeverisë, për të cilën nuk pranojnë negociata është pikërisht rishikimi i titujve shkencorë dhe identifikimi i plagjiaturave.

Zbulimi i plagjiaturës së Monika Kryemadhit u bë publik një ditë më parë:

” Pas disa orë kërkimi në internet, kemi zbuluar edhe plagjiaturën e Tezes se Doktoraturës së Monika Kryemadhit, me titull “Analiza e sistemit të sigurimeve shoqërore në këndvështrimin ekonomik dhe Juridik”, pranë Faktultetit te Ekonomisë, Universiteti i Tiranes, me udhëheqës shkencor prof. dr. Dhori Kule, e mbrojtur në vitin 2015.

Plagjiatura e tezes së zonjës Monika Kyremadhi është bërë duke kopjuar pothuajse tërësisht dy kapituj nga libri “European Ëelfare States: Comparative Perspectives” me autor Mel Cousins, shtëpia botuese SAGE Publications, viti i publikimit 2005. ”

Ende nuk ka një reagim publik nga Monika Kryemadhi apo përfaqësues të tjerë të LSI,  në lidhje me denoncimin.

Ndërkohë që Taulant Muka sot deklaroi në faqen e tij të “Facebook” se do t’i çojë në Prokurori rastet që ka akuzuar për palgjiaturë, për të cilat ligji parashikon deri në dy vite burg.

Rastet e plagjiaturave në radhët e figurave publike dhe të politikës që Muka ka denoncuar, janë: ish-zv ministri i Arsimit dhe Sporteve, Ervin Demo, deputetja Blerina Gjylameti,  rektori i Universitetit të Tiranës Dhori Kule, deputeten Mimi Kodheli, dhe një nga kryetaret e opozitës Monika Kryemadhi.

Citizens Channel / F.S

Dita e 8 e protestës: Masivizohet protesta në Tiranë, bashkohen edhe nxënësit e gjimnazeve

Ora 8:30: Nis protesta në universitetet publike në Tiranë dhe në rrethe siç ishte paralajmëruar. Sot mbushet një javë që nga fillimi i protestës studentore e cila kundërshton tarifat e larta në universitetet publike dhe kërkon një arsim cilësor dhe kushte më të mira jetese për studentët.

Studentët nuk kanë lejuar hyrjen e pedagogëve në Fakultetin e Mjekësisë, Politeknikut dhe Shkencave Sociale duke bllokuar dyert e fakulteteve përkatëse.

Protesta nga univesitetet në Ministrinë e Arsimit janë mbajtur gjatë gjithë javës, por për sot ishte paralajmëruar një protestë masive duke i lënë afat përfundimtar Qeverisë për plotësimin e tetë kushteve që studentët kërkojnë t’iu plotësohen.

Aktualisht po protestohet edhe në Korçë dhe në Elbasan duke iu bashkuar edhe nxënësit e shkollave të mesme të gjimnazeve “Dhaskal Todri” dhe “Kostandin Kristoforidhi”.

Mësohet se studentët nga Korça dhe Elbasani janë nisur për në Tiranë.

Nga protesta e ditës së sotme në Tiranë
Foto: Citizens Channel

 

Ora 9:15: Studentët bllokojnë kryqëzimin e “21 -dhjetorit” duke u ulur këmbëkryq në rrugë.  Protestës i bashkohen edhe studentët e Universitetit të Sporteve.

Ora 9:30 : Studentë dhe nxënës nisin marshimin nëpër rrugët e Tiranës duke thirrur: “E duam arsimin si gjithë Europa”.

Nis protesta edhe nga studentët e qytetit të Vlorës. Me pankarta në duar studentët theksojnë se nuk pranojnë dialog me Kryeministrin.

Ora 10 e 30: Nis marshimi i studentëve nga Korpusi drejt Ministrisë së Arsimit

Ora 10:40 : Studentët e UBT marshojnë në Tiranë

Ora 11:00 : Studentët marshojnë para rrugëve kryesore në Tiranë dhe mblidhen pranë Ministrisë së Arsimit.  Protesta të studentëve janë duke u zhvilluar edhe ne Gjirokastër, Korçë, Vlorë, Elbasan, Durrës dhe Shkodër

Nga protesta e stotme e studentëve në Tiranë pranë Ministrisë së Arsimit

Ora 12:30 : Vazhdon protesta masive studentore në Tiranë pranë Ministrisë së Arsimit. Ata i janë përgjigjur ftesës së tretë të Kryeministrit Rama në Facebook për bisedime duke theksuar se nuk duan negociata por plotësim të kushteve të paraqitura.

Ora 13:20: Studentëve protestues në Tiranë pranë Ministrisë së Arsimit, iu bashkohen edhe studenët e ardhur nga Universiteti i Elbasanit dhe nga Universiteti i Durrësit. Ata janë mirëpritur në shesh

Ora 03:30:

Studentët vazhdojnë të vendosur të protestojnë prej disa orësh pranë Ministrisë së Arsimit, me ta janë bashkuar nxënës, studentë nga qytetet e tjera si dhe qytetarë që i mbështesin.

Ata i kanë lënë afat Qeverisë deri në orën 16:00 për t’i përmbushur kërkesat e tyre. Kanë ngelur vetëm 30 minuta nga afati i vendosur nga studentët dhe ata duken të vendosur për të mos i negociuar kërkesat e tyre.

Citizens Channel/ F.S

 

Pritet të ndryshojë ligji për prokurimet publike

Jo rrallë herë ka pasur debate publike mbi mënyrën se si Qeveria apo Pushteti Vendor i menaxhon dhe i shpërndan fondet publike. Shpeshherë ka pasur të dhëna se fondet publike i përfitojnë persona të dënuar penalisht,procedurë që ligji e dënon.

Në datën 29 tetor 2018 është propozuar një ndryshim shumë i rëndësishëm për ligjin aktual të prokurimeve publike i cili ka të bëjë më skualifikimin e personave të dënuar penalisht më parë.

Të dënuarit për vepra penale që lidhen me krimin e organizuar, korrupsionin apo terrorizmin nuk do të kenë mundësi të përfitojnë fonde publike dhe nuk bëhet fjalë vetëm për individë në pozita drejtuese por edhe  aksionarët, ortakët apo anëtarët e organeve administrative, drejtuese apo mbikëqyrëse.

Agjencia e Prokurimit Publik që është përgjegjëse për monitorimin dhe mbarëvajtjen e procedurave për realizimin e prokurimeve publike kur u pyet nga Citizens Channel në muajin tetor  nëse dispononin një database në lidhje me kompanitë që nuk duhet të merrnin pjesë në prokurimet publike u përgjigjën se nuk e dispononin një listë të tillë dhe se në këto raste problematika referohet tek Komisioneri i Prokurimit Publik.

Citizens Channel në një artikull të publikuar rreth një muaj më parë zbuloi se kompani të dënuara për korrupsion ose shpërdorim detyre fitonin tendera shtetërorë duke marrë miliarda lekë nga buxheti i shtetit.

Ilustroi: Marin Nikolli

Disa nga kompanitë kryesore ishin:

  • “INERTE EXPRES”, pronari i së cilës ishte i dënuar më 21 vite burg në Itali për trafik droge.
  • “Fusha sh.p.k” e dënuar për shpërdorim detyre dhe e evidentuar nga Kontrrolli i Lartë i Shtetit si një nga kompanitë që ka kryer shkelje.
  • “Vëllezërit Hysa” të arrestuar për veprën penale të vjedhjes dhe shpërdorimit të detyrës, por pavarësisht kësaj vijojnë të përfitojnë tendera publikë.
  • “Gjergjefi” kjo kompani është akuzuar për shpërdorim detyre, por megjithatë vazhdon të përfitojë fonde publike.

Bazuar në relacionin shoqërues të tij, ky ndryshim ka ardhur si pasojë e “luftës ndaj krimit të organizuar”.

Çfarë janë prokurimet publike?

Prokurim publik është procesi i përzgjedhjes nga Autoritetet Publike kontraktuese i operatorëve që lidhin kontrata për ofrimin e mallrave, shërbimeve ose punëve.  Prokurim publik quhet shpërndarja përmes konkurrimit e çdo vlere monetare të:

  • buxhetit të shtetit,
  •  e buxhetit vendor,
  •  fonde ndihmë
  • kredi të dhëna nga donatorë të huaj sipas një marrëveshjeje ndërkombëtare të cilat kërkojnë zbatimin e procedurave ligjore të vendit.

Gjithashtu bëjnë pjesë tek fondet publike edhe të ardhurat nga shteti, nga ndërmarrjet lokale, shoqëritë tregtare dhe entet e tjera, ku shteti zotëron shumicën e aksioneve ose të kapitalit, të cilat janë përcaktuar për përdorim në prokurimet publike.

*Citizens Channel / F.S

 

 

Çështja mjedisore për ta mbajtur orën e verore…gjithë kohës

Rezulton se shkuarja herët në shtrat dhe ngritja herët në mëngjes e bën njeriun të shendetshëm, të pasur dhe…efiçent.

Pas orës 1 të natës në Oksford, papritmas koha shënoi orën 2, dhe Britania e Madhe u fut  zyrtarisht në atë që quhet “Koha Verore Britanike”, në të cilën do të qëndrojë për 7 muajt e ardhshëm. Pjesa tjetër e Europës, i çoi akrepat e orës një orë para në të njëjtin moment, ndërsa Shtetet e Bashkuara dhe Kanadaja kaluan në “orën verore” në fillim të marsit. Kjo praktikë është e njohur si kursim i kohës gjatë ditës.

Po nëse të gjitha këto vende do të mbanin orën e verës gjatë gjithë dimrit? Rreth një dekadë më parë, studiuesit në Universitetin e Kembrixhit patën bënë një hipotezë të fortë në lidhje me këtë dhe që në Mbretërinë e Bashkuar të paktën, do të kishte një varg efektesh pozitive.

Dymbëdhjetë muajt e orës së verës mund të zvogëlojnë vdekjet në rrugë dhe krimin, të nxisin biznesin dhe tregtinë dhe gjithashtu të reduktojnë konsumin e energjisë në kohë maksimale deri në 8%. E gjithë kjo është e mundur, sepse periudhat tona më aktive do të përputheshin më mirë me orët e ditës.

Zhvendosja e kohës së përdorimit të energjisë elektrike ka rritur axhendën akademike për një arsye tjetër. Kërkesa fleksibile ka potencialin për të kursyer miliarda në integrimin e burimeve të ripërtëritshme, të tilla si era dhe dielli.

Logjika është e thjeshtë: kërkesa më e lartë për energjinë  është në dimër rreth orës 17.30. Kjo ndodh kur njerëzit vijnë në shtëpi dhe shumë biznese janë ende të hapura. Ndodh gjithashtu kur është  ftohtë dhe errët dhe ne kemi nevojë për energji shtesë për ngrohje dhe dritë. Megjithatë, prodhimi nga energjia diellore me karbon të ulët është shumë e mundur të jetë zero.

5:00 e mbasdites apo 6:00?
Burimi: The Conversation

Nëse Koha Britanike Verore do të vazhdonte gjatë dimrit, problemi i pikut të kërkesës do të zvogëlohej. Gjithkush do të ngrihej një orë më herët, do të punonte më herët dhe do të kthehej në shtëpi më herët, shpesh kur ende ka dritë. Aktiviteti do të vazhdonte të kishte kulmin në orën 5:30, por në të njëjtën kohë do të ishte më herët sesa në përëndimin e diellit.

Duke pasur parasysh se ndriçimi mund të jetë përgjegjës vetëm për 20% të kërkesës kulmore në Britaninë e Madhe, ka shumë mundësi për kursimin e energjisë. Një studim zbuloi se përdorimi i energjisë në kohë të ndryshme mund të çonte në uljen e pikut deri në 8%.

Në mbrëmjet kur ka ende dritë, mund të ketë akoma energji diellore për uljen e mëtejshme të kërkesës neto për lëndë djegëse fosile. Kursimet në mbrëmje do të tejkalonin çdo rritje potenciale në mëngjes. Pra, pse nuk flasim më shumë rreth asaj se si mund të ndihmonin orët e ditës përpjekjet për të dekarbonizuar? Një arsye është ekonomia politike – ndërsa ngritja një orë më parë ka kuptim për një ekspert në politikën e energjisë apo sigurinë rrugore, nuk do të ishte domosdoshmërisht popullore për  publikun (për të mos përmendur fermerët skocezë ose fëmijët adoleshentë).

Është i njëjti problem që prek shumë masa të tjera potencialisht shumë të ndjeshme për kursimin e energjisë: sa më shpejt që të ketë madje një shans të largët  por jo të përshtatshëm për njerëzit, nuk ka gjasa të shohë dritën e ditës. Kjo është pjesë e arsyes pse bërja e politikës së energjisë dominohet nga masat për të rritur furnizimin siç janë bimët e reja bërthamore ose mbështetja për burimet e ripërtëritshme. Përmbushja me anën e kërkesës kërkon shumë guxim politik.

Është interesante se si një shoqëri e tërë ri-sinkronizon aktivitetet e saj bazuar në një ndryshim të akrepave të orës. Megjithatë, nëse njerëzit ngecin në ritmin e tyre ata mund të shmangin orët më të këqija dhe madje të kthehen në shtëpi gjatë ditës, gjatë dimrit.

Sigurisht që nuk është kaq e thjeshtë. Ritmet tona ditore forcohen fuqishëm nga konvencionet tradicionale, të tilla si orët e punës, orët e shkollimit dhe orari i hapjes së dyqaneve. Filloi në shekullin e 19-të me fabrikat që përdorin kohën për të sinkronizuar fuqinë punëtore të tyre në në turnet. Me ardhjen e hekurudhave, orët në të gjithë vendin u sinkronizuan dhe miliona njerëz filluan të vepronin në të njëjtin ritëm – jo ritmin e tyre natyror, por ritmin e orës.

Ka disa përfitime të dukshme në pasjen e një fuqie punëtore në të njëjtin vend në të njëjtën kohë. Megjithatë, kur shikohet sistemi si një i tërë, sinkronizimi sjell me vete disa sfida serioze, sidomos për kufizimet e kërkesës kulmore.

Prandaj nuk mund të jetë e dobishme që të ndërrosh ditën e secilit për një orë me një ndryshim të orës në sinkronizim në nivel kombëtar. Lejimi për të zhvilluar më shumë diversitet mund të jetë i favorshëm. Orët më fleksibël të punës mund të zvogëlojnë dhe të përhapin majat. Kjo madje mund të inkurajohet në rajone të ndryshme, duke pasur parasysh se Cornwall, në bregun jugor të Anglisë, përballet me kushte shumë të ndryshme të ditës sesa, për shembull, në veri të Skocisë.   Nuk duhet të prisni as qeverinë. Vjeshtën tjetër, kur orët të kthehen, rebelohuni dhe thjesht shkoni në shtrat një orë më parë – domethënë, mos ndryshoni asgjë. Ju jo vetëm që do të zvogëloni kërkesën për energji, por do të ndihmoni gjithashtu në diversifikimin e saj.

 

Çfarë i shtyn shqiptaret të emigrojnë?

Një studim i realizuar nga Qendra për Studime Ekonomike dhe Sociale ka marrë në analizë arsyet pse shqiptarët duan të emigrojnë duke i krahasuar ato me të dhëna të vitit 2007.

Bazuar në anketat me 1423 familje, ndër arsyet që i shtyjnë shqiptarët të largohen vihet re një rënie e faktorëve ekonomik (-9.5%) dhe atyre familjar (-9.6). Ndërkohë rritje të lartë kanë arsyet që lidhen me edukimin e fëmijëve (+ 9.5%) dhe numri i personave që nuk shohin një të ardhme në Shqipëri (7.9%).

Megjithatë motivet ekonomike si përmirësimi i standardit të jetesës, papunësia apo natyra e punës mbeten në vend të parë, njëlloj si në vitin 2007. Në ndryshim nga studimi i mëparshëm, në vend të dytë renditen arsyet që lidhen me të ardhmen në Shqipëri dhe në vendin e tretë ku më parë ishin arsyet familjare tani renditet edukimi.

Grafika më poshtë jep një panoramë të plotë të arsyeve të emigrimit potencial, krahasuar me vitin 2007

Një ndër gjetjet kryesore të këtij studimi është se dëshira për tu larguar e segmentit më aktiv të shoqërisë (18-40vjecc), është rritur me 7% krahasuar me vitin 2017.
Profesor Russell King, një nga udhëheqësit e këtij studimi jep interpretimin e tij mbi këtë situatë: “Nëse disa largohen dhe kthehen sërish, me aftësi më të mira nga eksperiencat jashtë, sigurisht ky mund të jetë një proces fitimprurës. Kemi dy interpretime kundërshtuese mbi këtë fenomen. Një është migrimi i trurit, tjetri është rritja e trurit apo rikthimi i trurit nëse njerëzit kthehen. Ndaj duhet të presim dhe të shohim se si do të jetë shkalla e rikthimit në të ardhmen.”

Citizens Channel zhvilloi disa intervista me të rinjtë e Universiteteve për të kuptuar më shumë rreth motiveve që i shtyjnë të largohen:

Dr. Ilir Gedeshi, drejtor i Qendrës për studime Ekonomike dhe Sociale shpjegon se ka një ndrysim mes rritjes së migrimit potencial dhe shtimit të kërkesave për azil: “Kemi dy dallime kryesore, në migrimin potencial dëshirojnë më tepër të migrojnë personat e kualifikuar dhe të arsimuar, ndërsa nëpërmjet kërkesës për azil kanë qenë kryesisht persona të pakualifikuar dhe me një arsim më të ulët se sa mesatarja. Politika duhet të synojë që nëpërmjet marrëveshjeve nëpërmjet agjencive të punësimit të ndihmojë, meqënëse emigrimi tani është një proces që nuk mund të ndalet.

Lexo më shumë: Cilat janë shtetet ku duan të emigrojnë shqiptarët?

*Citizens Channel /l.k./

Biçikletë, ecje, makinë apo transport publik? Mënyrat më të shëndetshme (dhe më të sigurta) për të lëvizur në qytet

Ka shumë mënyra për të lëvizur në qytet. Mund të drejtoni një makinë ose një motor, në shumë qytete keni mundësinë e transportit publik. Dhe natyrisht nëse jetoni mjaft afër vendit që  dëshironi të shkoni, mund të lëvizni në mënyrë më aktive duke hipur në biçikletë ose duke ecur.

Çiklizmi mund të jetë i rrezikshëm në disa raste, por është gjithashtu i shëndetshëm. Por a janë  përfitimet shëndetësore më të mëdha se rreziqet e vdekjes së mundshme? Po në lidhje me transportin publik apo makinën? Cili është rreziku i aksidentit dhe a ka ndonjë përfitim shëndetësor? Ekzistojnë një sërë ndryshoresh, prandaj përgjigjet e këtyre pyetjeve mund të mos jenë aq të drejtpërdrejta sa mendoni.

Variabla të  ndryshme

Sa i përket sigurisë, disa gjëra që duhen marrë parasysh përfshijnë vendndodhjen tuaj, distancën e udhëtimit dhe kohën e ditës që po udhëtoni. Me më shumë njerëz në rrugë gjatë orëve të mëngjesit dhe të mbrëmjes, kjo është qartësisht koha më e rrezikshme për të udhëtuar.

Variabla të tjera, të tilla si cilësia e rrugëve, kushtet atmosferike si dhe aftësia juaj si shofer do të merren në konsideratë. Një faktor tjetër është gjendja juaj mendore gjatë udhëtimit. Për shembull, a jeni nën ndikimin e alkoolit ose jeni të hutuar nga telefoni juaj celular?

Gjithsesi, personat që jetojnë në vendet perëndimore,  kanë pak gjasa të vdesin gjatë udhëtimit nëpër qytet. Por gjithsesi këto janë thjesht shifra.

Çiklizmi

Foto: Shutterstock.com

Të  ngasësh biçikletën është mënyra më e shëndetshme për të lëvizur. Jo vetëm që ju çon në destinacionin tuaj, por gjithashtu përfshin një  stërvitje me intensitet të lartë.

Disa mund të kenë frikë nga çiklizmi. Një raport i fundit nga Shoqata e Automobilave Australiane tregoi se 45 çiklistë vdiqën në rrugët Australiane gjatë 12 muajve të fundit, krahasuar me 25 vdekje të regjistruara gjatë së njëjtës periudhë në 2016-17. Kjo është një rritje prej 80%. Por është e rëndësishme të mbani mend se rreziku i përgjithshëm i popullsisë për të pasur një aksident të tillë është i vogël. Në vendet perëndimore një person duhet të udhëtojë rreth 47 kilometra me biçikletë për të pasur një shans vdekje një në  një  milion.

Përfitimet shëndetësore të çiklizmit janë  më të  larta se rreziku. Një studim i vitit 2017 i më shumë se 250,000 njerëzve në Britani të Madhe tregoi se ushtrimi i çiklizmit ul rrezikun e vdekjes me rreth 40%. Ky studim përfshinte gjurmimin e njerëzve për rreth pesë vjet duke analizuar marrëdhëniet mes mënyrës se si ata udhëtojnë dhe rezultateve shëndetësore.

U mor parasysh mosha, seksi, gjendja socio-ekonomike, përkatësia etnike, pirja e duhanit, dieta dhe llojet e tjera të aktivitetit fizik. Ky vlerësim gjithashtu mori parasysh rreziqet që  hasin shpesh çiklistët, të tilla si aksidentet dhe ekspozimi ndaj ndotjes. Pra, kur ju udhëtoni me biçikletë , përfitimet shëndetësore që zvogëlojnë rrezikun e vdekjes, tejkalojnë shanset tuaja reale për të vdekur në rrugë.

Ecja

Foto: Shutterstock.com

Raporti i Shoqatës së Automobilistikes Australiane tregoi se gjatë 12 muajve të fundit, 177 këmbësorë u vranë në rrugë, duke përfaqësuar një rritje prej 4.7% nga një vit më parë. Por përsëri, rreziku i popullsisë që ecën është i ulët. Nëse jetoni në një vend perëndimor, ju do të duhet të ecni rreth 27 km për të pasur një mundësi vdekje një  në  një milion.

Ecja është një alternativë e shëndetshme për të lëvizur rreth qytetit, edhe pse përfitimet nuk janë aq të mëdha sa me çiklizmin, gjithashtu ecja duhet të  bëhet në një distancë të konsiderueshme çdo javë.

I njëjti studim i Britanisë së Madhe, siç tregohet më lart, tregon se ecja ka ulur rrezikun e sëmundjeve me 27% dhe rrezikun e vdekjes për shkak të sëmundjeve të zemrës me rreth 36%. Megjithatë, një person duhet të ecë të paktën 10 km çdo javë për të pasur këtë përfitim.

Transporti publik

Foto: Shutterstock.com

Transporti publik gjithashtu duket se përmirëson rezultatet shëndetësore. Kjo mund të jetë thjesht për faktin se marrja e transportit publik në mënyrë të pashmangshme përfshin disa ecje. Natyrisht, duke qenë afër shumë njerëzve ka dobësitë e saj, siç është rritja e rrezikut të ekspozimit ndaj sëmundjeve ngjitëse.

Një studim tjetër ka sugjeruar se mund të ketë një rritje gjashtëfish në rrezikun e marrjes së një sëmundjeje respiratore akute gjatë përdorimit të transportit publik. Por ky studim ishte relativisht i vogël dhe marrëdhënia ndërmjet marrjes së transportit publik dhe transmetimit të sëmundjes ishte e paqartë. Një tjetër studim sugjeroi se përdorimi i rregullt i transportit publik mund të krijojë imunitet, gjë që mund të rezultojë në një zvogëlim të rrezikut për të kontraktuar një sëmundje.

Pra, nuk ka asnjë justifikim për shmangien e transportit publik për shkak të frikës nga kontraktimi i ndonjë sëmundjeje. Por marrja e pilulave kundër gripit madje edhe vendosja e një maske mund të zvogëlojë rreziqet që mund të ekzistojnë, sidomos gjatë sezonit të ftohtë.

Dhe kur vjen puna te rreziku për të vdekur nga një aksident, marrja e një treni (në një vend perëndimor) është në të vërtetë mënyra më e sigurt për të udhëtuar. Ju do të duhet të udhëtoni pothuajse 10,000 km për të pasur një mundësi  një në  një  milion për të vdekur.

Makina apo motorri

Foto: Shutterstock.com

Drejtimi i një  motoçikletë është  mënyra më  e rrezikshme  për të udhëtuar, në  lidhje me mundësinë  për të  vdekur. Ju jeni 1000 herë më shumë i ekspozuar ndaj vdekshme rrisë  nga udhëtimi me motor sesa nëse jeni duke udhëtuar me tren. Për rreth 10 km udhëtim me një motor ju keni një mundësi prej një në  një  milion për të  vdekur.

Në Australi, 580 shoferë (të makinave) u vranë në 12 muajt e fundit – 1.8% më shumë se një vit më parë. Por, rreziku për të vdekur në një aksident me makinë është në të vërtetë relativisht i pamundur, edhe pse rreziku juaj i lëndimit është më i lartë. Ju do të duhet të udhëtoni rreth 330 km që të keni një në një milion mundësi për të vdekur. Këto shifra tregojnë se udhëtimi me makinë është përafërsisht shtatë herë më i sigurt se udhëtimi me një biçikletë

Pra, nëse doni ta bëni udhëtimin tuaj të përditshëm një  aktivitet promovues shëndetësor, çiklizmi është mënyra më e mirë. Ecja (duke supozuar se është një distancë e arsyeshme) është shumë e mirë. Marrja e transportit publik është më e sigurt nëse keni frikë nga aksidentet.

Burimi: The Conversation

*Citizens Channel /F.R/

Nacionalistët e bardhë të paktë në numër në protestën në Washington

Nacionalistët e bardhë zhvilluan një protestë afër Shtëpisë së Bardhë në Uashington, por ishin shumë më të paktë në numër se kundër-protestuesit.

Rreth 20 mbështetës të së djathtës ekstreme morrën pjesë në demonstratë e cila u zhvillua 1 vit pas ngjarjeve të dhunshme në Sharlotsvill, Virxhinia, në të cilën  një person mbeti i vdekur.

Qindra kundërprotestues u grumbulluan afër tyre duke denoncuar supremacinë e të bardhëve dhe racizmin. Të dy anët e protestuesve u mbajtën të ndara nga njëra-tjetra nga një prezencë e madhe e policisë.

Rreth 400 njerëz priteshin t’i bashkoheshin protestës së të djathtës ekstreme por numri ishte shumë më i vogël.

Nacionalistët e bardhë u shoqëruan nga oficerët e policisë në Sheshin Lafayette, përballë Shtëpisë së Bardhë dhe u ndaluan në rrugë nga kundërprotestuesit të cilët thërrisnin, “turp” dhe “largohu nga qyteti im”.

Siguria ishte shumë e lartë dhe autoritetet ndaluan armëmbajtësit në atë zonë.

Pas rreth 2 orësh, nën një shi të rëndë,  protesta mbaroi dhe mbështëtësit u shoqëruan nga policia në dy furgonë të policisë.

Një grup i madh kundërprotestuesish u mblodhën në Freedom Plaza,duke thirrur në kor dhe duke tundur banera.

 

Ndërkohë që një grup i vogël supermacistësh të bardhë u grumbullua për protestën e dytë “Bashkimi i së djathtës”, shiu filloi të binte.

Organizatorët kishin aplikuar për një leje për rreth 400 persona, por nuk u grumbulluan më shumë se 20.  Kundërprotestuesit ishin në një numër shumë më të madh, dhe mbanin disa tabela me shenja të bëra me dorë, aktivistët e “Black Live Matters” dhe disa nga Antifa, militant të majtë, ishin veshur nga koka tek këmba me të zeza.

U mbyll çdo gjë në mënyrë paqësore dhe u shoqërua me një çlirim, pasur parasysh përplasjet e dhunshme të një viti më parë.

Policia kishte punuar shumë për të mbajtur larg protestuesit nga njëri-tjetri. Nëse kjo protestë tregoi diçka, ishte mesazhi i racizmit që nuk u dëgjua, në më shumë se një mënyrë.

Protesta e një viti më parë e së djathtës ekstreme në  Charlottesville, ishte një nga protestat më të mëdha të nacionalistëve të bardhë në dekada.

Foto: GETTY IMAGES / Burimi: BBC
Kundër-demonstruesit e së djelës të mbledhur në Freedom Plaza në Washington.

Heather Heyer, 32 vjeç, u vra pasi një shofer neo-nazist përplasi makinën e tij në një grup të protestuesve anti-racistë.

Shumë njerëz të tjerë u dëmtuan nga dhuna mes dy grupeve.

 

Burimi: BBC/ Përktheu dhe përshtati: Citizens Channel/ F.S

 

 

 

Protesta masive në Rumani, kërkohet largimi i qeverisë

 

Protesta masive kanë nisur ditën e premte në Rumani ku shumë rumunë që jetojnë jashtë shtetit u kthyen në atdhe për t’ju bashkuar protestave.

Mijëra protestues kanë kërkuar dorëheqjen e qeverisë Social-Demokrate rumune dhe e akuzojnë atë për korrupsion.

Në protestën e së premtes pati dhe përleshje të dhunshme dhe ngelën rreth 450 persona të dëmtuar. Mediat ndërkombëtare raportuan se policia rumune kishte përdorur gaz lotsjellës, spraj djegës dhe hedhëse uji kundrejt protestuesve. Presidenti rumun Klaus Iohannis, e ka dënuar ndërhyrjen e dhunshme të policisë.

Gjatë përleshjes së protestuesve me policinë

“Dënoj fuqimisht ndërhyrjen brutale të policisë, fuqimisht joproporcionale ndaj demonstruesve të shumicës së njerëzve në shesh. Ministri i Brendshëm duhet të japë urgjent shpjegime”, ka thënë ai.

Protesta, në të cilën një numër i madh ishin rumunë emigrantë jashtë vendit, përfshiu rreth 80 mijë persona. Ata kanë kërkuar dorëheqjen e qeverisë që e akuzojnë për korrupsion.

Sipas Bankës Botërore, pak më shumë se çereku i popullsisë në Rumani- rreth tre apo katër milion njerëz- jetojnë dhe punojnë jashtë vendit, por ndërkohë dërgojnë aty 5 bilionë dollarë, për një nga vendet më pak të zhvilluara të Bashkimit Europian.

Ndërkohë protesta ka vazhduar edhe një ditë më vonë, dhe sipas mediave edhe pas natës së dytë të manifestimit, protestuesit kanë ndërmend të vazhdojnë të protestojnë më gjatë.

Mediat shkruajnë se milona njerëz largohen për shkak të korrupsionit të lartë.

Gjatë protestës në Rumani

 

Background i protestës

Protestat janë zhvilluar kundër Partisë Social Demokrate për muaj.

Në korrik, presidenti Johanis aprovoi shkarkimin e prokurores anti-korrupsion, Laura Codruta Kovesi, e cila kishte hapur disa çështje të forta hetimore kundër korrupsionit të zyrtarëve të lartë, që përfshinin hetimin e politikanëve të politikës lokale dhe asaj kombëtare.

Presidenti Johanis u vu nën presion të fortë nga qeveria e PSD për shkarkimin e prokurores.

Gati 150 mijë vetë u bënë bashkë në Bukuresht vitin e kaluar, kur qeveria përgatiti dekretin që mund të lironte nga burgu ata që do të burgoseshin për korrupsion.

*Citizens Channel

Jeta e veçantë në ishullin kolumbian

Nga distanca është e vështirë të përcaktohet se çfarë është Santa Cruz del Islote. Duke ardhur nga deti, ishulli-një nga më të populluarit në botë, duket sikur është lundrues.

Në fakt, Santa Cruz – që ndodhet në arkipelagun San Bernardo të Kolumbisë në Gjirin e Morrosquillo – qëndron në një kombinim të shtratit të detit të ngritur dhe koraleve. Është një nga 10 ishujt në arkipelag.

Legjenda thotë së peshkatarët nga ishujt e afërt e kalonin natën në Santa Cruz dhe vendosën të qëndronin përgjithmonë kur kuptuan se atje nuk kishte mushkonja. Vendasit ja atribuojnë mungesën e mushkonjave, mungesës së pemëve dhe plazheve.

Santa Cruz nuk është një ishull tradicional. Aty nuk ka një vend ku vizitorët mund të qëndrojnë. Turistët zakonisht i kalojnë netët në hotelin Punta Faro në ishullin Múcura dhe udhëtojnë me varka për në ishullin Santa Cruz për të eksploruar për pak orë.

Është si të futesh në një novelë të  Gabriel García Márquez. Pamjet e Santa Cruz janë si një ëndërr, një mënyrë shumë e pafajshme e të jetuarit ( në Santa Cruz nuk ka policë), dhe shtëpi shumëngjyrëshe të cilat kanë kaluar  nëpër breza kështu që atje nuk ka banues jo vendas.

Disa vlerësime tregojnë se mund të vendosen 1200 banorë në ishullin e vogël që në fakt ka madhësinë e dy fushave të futbollit. Por disa thonë se komuniteti është më i vogël. Juve Nal që ka jetuar gjithë jetën në Santa Cruz thotë se është më shumë se 900.

“Mërzitemi nga media sepse thotë gjithmonë se ishulli është më i populluar se sa është në të vërtetë”, thotë Nal i cili duket si një lider i komunitetit, udhërrëfyes dhe zëdhënës, të treja në një.

Pavarësisht popullsisë ( e cila nuk dihet sepse nuk është bërë regjistrimi për dekada), Santa Cruz duket si një shtrëngim i lehtë.

Rreth 115 shtëpi që janë të vendosura në mënyrë josistematike me njëra-tjetrën, ndërkohë që burra të moshuar me sy të këndshëm dhe me fytyra të nxira nga moti, ulen dhe pijnë birra, djem adoleshentë që luajnë në rrugë dhe gra që bisedojnë me njëra tjetrën.

“Këtu nuk ka krime”, thotë Nal me krenari. “Ne nuk kemi polici dhe as që kemi nevojë për ata.”. Ai ndalet në një shesh të vogël të shënuar me një kryq, dhe thotë se ky është vendi më i mirë për të bërë foto sepse ishulli e merr emrin nga kryqi.

 

Një partneritet me hotelin Punta Faro ka rezultuar në krijimin e një akuariumi të vogël në Santa Cruz. Më parë Më parë, banorët e vendit trajtonin breshkat në të njëjtën mënyrë si pulat, duke i vrarë për mish. Tani, ata me kujdes i zgjidhin breshkat e kapura në rrjetat e tyre të peshkimit dhe kujdesen për to derisa ekipi i konservimit të hotelit t’i mbledhë ato.

Vendasit tregojnë se bëjnë jetë të qetë

Turistët mund të paguajnë një tarifë të vogël për të hyrë tek akuariumi, ku gjithashtu gjenden peshkaqenë të vegjël, dhe peshq.

Por, Santa Cruz është e mbushur me shtëpi. Banorët e ishullit kanë filluar të ndërtojnë katet më lart, pasi hapësira ka mbaruar për më shumë shtëpi në terren.

“Është një shqetësim për të ardhmen”, pranon Nal. “Ne po na mbaron toka dhe nuk e di se çfarë përgjigje është. Ne nuk mund të vazhdojmë të ndërtojmë lart dhe më lart”.

Por banorët e ishullit Santa Cruz nuk duan mëshirën tuaj.

“Ne jemi të lumtur”, thotë Nal. “Ku tjetër në botë nuk ka nevojë për policinë, ku tjetër mund të keni një ishull për vetëm komunitetin tuaj të vogël?

“Çdo ditë zgjohesh me zërin dhe pamjen e detit, nuk dua të jetoj diku tjetër”.

Nal, një lider i komunitetit, udhërrëfyes dhe zëdhënës, të treja në një.

 

Të vizitosh Santa Cruz

 

Vizitorëve u kërkohet të paguajnë 3.000 pesos ($ 1) pas mbërritjes në ishull. Në vitet e fundit, thotë Nal, më shumë kanë ardhur për të vizituar, duke bërë fotografi të banorëve të ishullit sikur të ishin duke vizituar një kopsht zoologjik.

“Ishte shumë e pahijshme”, thotë Nal. “Tani ju bëjmë ture dhe turistët kuptojnë se nuk jemi këtu vetëm për tu parë, por edhe mund të mësojnë për kulturën tonë”.

Ka shqetësime se ishulli do të bjerë si pasojë e rritjes së nivelit të detit. Alejandro Alzate, menaxher i përgjithshëm dhe bashkëpronar i Punta Faro, thotë se përmbytjet në Santa Cruz ndodhin rregullisht dhe mund të zhduken disa ditë nën valën në rritje.

“Vendasit nuk duan ta dinë këtë, megjithatë,” psherëtin ai. “Ata nuk do të dëgjojnë, sepse përfundimisht do të duhet të lëvizin dhe jeta në Santa Cruz nuk është diçka që mund të gjesh diku tjetër.

“Njerëzit janë krenarë që jetojnë atje, është më shumë sesa thjesht një komunitet, është një kulturë, një mënyrë jetese, ata nuk duan të jenë ndonjë vend tjetër”.

Jeta në ishull mund të duket e paqëndrueshme, por është një kaos i organizuar, dhe për banorët e ishullit funksionon shumë mirë.

*Citizens Channel, Burimi: CNN/ F.S