Konflikti midis dy investitorëve privatë ka lënë pa shtëpi 120 familje në rrugën Ndre Mjeda në Tiranë. Sipas kontratës së nënshkruar, banorët duhet të kishin hyrë në apartamentet e kompleksit “Star” që në vitin 2019.
“Na kanë thëne që prisni, prisni, ne kemi tre vjet që e kemi shtruar çështjen sepse kontrata, leje e ndërtimit mbaroj para tre vjetësh, por në mënyrë të njëanshme Bashkia e shtyu lejen e punimeve edhe tre vjet të tjera “, – tha për Citizens Channel një prej banorëve, Ardian Pupi.
Ndërkohë që banorët pritën deri në fund të korrikut kur përfundoi afati për shtyrjen e lejes, sërish ata nuk lejohen të hynë brenda.
“Ne jetojmë me qira kështu që është një problem shumë i ndërlikuar. Bashkia s’po na jep zgjidhje”, – tregon Urie Lleshi, një tjetër banore.
Edhe pse me dokumentacion dhe pagesa të rregullta banorët prej tre vitesh janë të detyruar të paguajnë qira.
“Unë vetë jam banor i Lushnjës, vij nga rrethet, vij nga Lushnja, prandaj edhe kam sakrifikuar dhe investuar për fëmijët e mi dhe ata nuk po e gëzojnë dot pronën e tyre”, – vijon Ardian Pupi.
Banorët prej dy ditësh protestojnë para Bashkisë Tiranë duke pretenduar se ky institucion duhet të reagoj për të sqaruar situatën por deri më tani Bashkia nuk i ka pritur dhe nuk ka reaguar në lidhje me rastin në fjalë.
300 banorët të cilët kanë nënshkruar marrëveshjen me administratorin e shoqërisë “Star Construction ShPK” kanë hyrë tashmë në shtëpitë e tyre ndërsa 120 të tjerët të cilët kanë firmosur me administratorin e “Llanaj Ndërtim ShPK” nuk e dinë ende çfarë fati i pret.
“Si ata 300 banorë të investitorit tjetër, edhe ne të gëzojmë shtëpitë tona siç po i gëzojnë edhe ata. Problemet që kanë me njëri tjetrin ata ti zgjidhin në rrugë gjyqësore, kur të duam, sa të duan”, – përfundon Ardian Pupi.