Një grup gazetarësh protestuan dje përpara kryeministrisë kundër dhunës dhe intimidimit të punonjësve të medias. Me titullin “Kryeministër jep llogari për dhunën ndaj gazetarëve”, pjesëmarrësit nënvizuan trynisninë që u vjen nga ligjvënësit, për shkak të profesionit.
Protesta u nxit nga rasti i fundit, ku kryeministri Rama gjatë pyetjeve në një konferencë për shtyp preku fizikisht gazetaren Ambrozia Meta, të Syri Televizion. Vetë kryeministri e cilësoi një gjest përzemërsie të keqkuptuar veprimin e tij gjatë një dalje publike, gjest i cili u denoncua masivisht nga organizata të ndryshme kombëtare dhe ndërkombëtare.
“Jemi mbledhur këtu para kryeministrisë sepse liria e fjalës, liria e medias, nuk ka qenë kurrë më e kërcënuar dhe më e dhunuar sesa sot”- tha gjatë fjalës së saj gazetarja Aurora Velaj.
Velaj rikujtoi rastet kur kryeministri u mundua të dominojë skenën mediatike duke marrë rolin e gazetarëve, me krijimin e ERT – së, por edhe prodhimin e përjavshëm të podkasteve.
“Gjatë viteve të fundit ka ndodhur një lloj putinizim i medias. Sipas “Reporterëve pa Kufij” rezulton se të gjitha mediat e rëndësishme janë rreshtuar në anën e pushtetit”- analizoi Velaj.
Protestës iu bashkuan edhe gazetarë, të cilët janë gjendur nën sulme të vazhdueshme përgjatë muajve të fundit, për shkak të profesionit.
“Deri dje na u bë normale të shkelim standardet e mirë raportimit, pasi kishim frikë të dërgonim një kërkesë për koment, pasi mund të binte telefoni dhe të na censurohej lajmi”- theksoi gazetarja Ola Xama.
Xama shtoi se një pjesë e gazetarëve të pavarur sot nuk kanë zë dhe nuk kanë as mbështetjen e organizatave mediatike vendase. Ajo u shpreh se kjo protestë nuk duhet të jetë për emra të përveçëm, por për standarde dhe për respektimin e lirisë së medias në Shqipëri.
“Jo të na premtohet dhe të na garantohet se jemi në lirinë e fjalës dhe nëse ne shkruajmë, ne publikojmë, ne më pas denigrohemi publikisht, profesionalisht dhe personalisht“- përfundoi Xama.
Isa Myzyraj përmendi raste të ngjashme të politikanëve, të cilët i përngjajnë komunikimit dhe sjelljes së kryeministrit.
“Dua të sjell rastin e fundit të kryetarit të Bashkisë së Rrogozhinës, i cili është një burokrat krejt periferik, që po përballet me akuza dhe hetime nga SPAK, por zgjedh të përdorë të njëjtën gjuhë që ka përdorur më herët dhe kryeministri i vendit kundër gazetarëve“- tha Myzyraj.
